Էրդողանի անսահմանափակ իշխանությո՞ւն, թե՞ էրդողանական ժամանակաշրջանի ավարտ։ Այսօր այս հարցի պատասխանն են տալու Թուրքիայի քաղաքացիները։ Չի բացառվում նաև, որ ընտրություններում Էրդողանի պարտությունը նոր իրողություններ ի հայտ բերի Թուրքիայի արտաքին քաղաքական ուղեգծում։
Այսօր Թուրքիայում ընտրություններ են․ Թուրքիան ընտրելու է իր 13-րդ նախագահին ու 27-րդ գումարման խորհրդարանը՝ միլլի մեջլիսը։ Ընտրությունները սկսվել են առավոտյան ժամը 8։00-ին և կավարտվեն 17-00-ին։ Ընտրության իրավունք ունեցողների թիվը 56,3 միլիոն է, որից 3,47 միլիոնը բնակվում է արտասահմանում, մեծ մասը՝ Գերմանիայում։
Նախագահի թեկնածուները վեցն են՝
1․ Մուհարեմ Ինջե,
2․ Մերալ Աքշեները,
3․ Ռեջեփ Թայիփ Էրդողան,
4․ Սելահաթթին Դեմիրթաշ,
5․ Թեմել Քարամոլաօղլու,
6․ Դողու Փերինչեք։
Հիմնական մրցակցությունն ընթանում է գործող նախագահ Էրդողանի ու Մուհարեմ Ինջեի միջև։
Խորհրդարանական ընտրություններին կուսակցությունների մի մասը մասնակցում է դաշինքով․
1․ Հանրապետական դաշինք․ «Արդարություն և զարգացում» կուսակցություն, «Ազգայնական շարժում» կուսակցություն։ Այս դաշինքում միավորվել են Էրդողանի կուսակցությունն ու ազգայնականները՝ գորշ գայլերը։
2․ Հուդա-ՓԱՌ
3․ Հայրենիք կուսակցություն
4․ Ժողովուրդների դեմոկրատական կուսակցություն
5․ Ազգային դաշինք․ «Ժողովրդահանրապետական կուսակցություն», «Սաադեթ» կուսակցություն, «Իյի» կուսակցություն։
Հիմնական պայքարն ընթանալու է Հանրապետական ու Ազգային դաշինքներիի միջև։ Թուրքիայում ընտրական շեմը 10 տոկոս է, որը կարող է հաղթահարել նաև քրդամետ Ժողովուրդների դեմոկրատական կուսակցությունը։
Մինչև ժամը 18։00-ն լրատվամիջոցներն իրավունք չունեն ընտրություների արդյունքների մասին որևէ լուր հրապարակել։ Ամբողջ օրվա ընթացքում երկրի տարածքում արգելված է ալկոհոլային խմիչքի վաճառքն ու զենք կրելը։ Փակ են լինելու նաև զվարճանքի բոլոր կենտրոններն ու ինտերնետ ակումբները։
Այսօր կեսգիշերից առաջ կհայտարարվեն նախագահի ընտրություների նախնական արդյունքները։ Այս ընտրություններից հետո Թուրքիայում գործելու է նոր սահմանադրություն։ Եթե հաղթի Էրդողանը, ապա նա գրեթե անսահմանափակ իշխանություն կունենա։ Չի բացառվում նաև, որ այս ընտրություններն ազդարարեն Թուրքիայում էրդողանական ժամանակաշրջանի ավարտը։
Գոռ Երանյան