Հունաստանի հարավ-արևելքում մոլեգնող հրդեհները տասնյակ կյանքեր են խլել։ Վերջին տվյալներով՝ տարերային աղետի հետևանքով զոհվել է 77 մարդ։
Զոհվածներից շատերը չեն կարողացել դուրս գալ Աթենքից 40 կմ հեռավորության վրա գտնվող Մաթի գյուղից։ Մարդիկ ծխախեղդ են եղել իրենց տներում և մեքենաներում։
Հարյուրավոր հրշեջներ պայքարում են կրակի դեմ, փրկարարները տարհանում են մարդկանց։
Տուժածներից մեկը պատմել է, որ տեղի ունեցածը Պոմպեյն էր հիշեցնում։
Հունաստանի վարչապետ Ալեքսիս Ցիպրասը հայտարարել է, որ արվում է մարդկային ուժերի սահմաններում ամեն ինչ՝ իրավիճակը վերահսկելու համար։
BBC-ն հաղորդում է, որ առաջիկա օրերին Հունաստանում ջերմաստիճանը կրկին կբարձրանա, իշխանությունները ավելի ու ավելի քիչ ժամանակ ունեն կրակի տարածումը կանգնեցնելու համար։
Հրդեհների պատճառը դեռ հայտնի չէ, այս պահին հետաքննություն է տարվում։
