Նախաքննության շահերից ելնելով՝ Հատուկ քննչական ծառայությունը (ՀՔԾ) որևէ տեղեկություն չի կարող տրամադրել Հովիկ Աբրահամյանին հարցաքննության հրավիրելու մասին։
Որոշ լրատվամիջոցներ, հղում անելով սեփական աղբյուրներին, հայտնում են, որ ՀՔԾ-ն ծանուցում է ուղարկել ՀՀ նախկին վարչապետ Հովիկ Աբրահամյանին՝ Մարտի 1-ի գործով հարցաքննելու համար:
ՀՔԾ լրատվական ծառայությունից «Արմենպրես»-ին հայտնել են, որ նախաքննության շահերից ելնելով՝ որևէ տեղեկություն այդ մասով չեն կարող տրամադրել:
«Անհրաժեշտության դեպքում լրացուցիչ տեղեկատվություն կտրվի»,- ասել են ՀՔԾ լրատվական ծառայությունում:
ՀՀ հատուկ քննչական ծառայության վարույթում գտնվող, 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած դեպքերի վերաբերյալ քրեական գործի շրջանակներում ՀՀ ազգային անվտանգության ծառայության աշխատակիցների կողմից իրականացված օպերատիվ-հետախուզական միջոցառումների արդյունքում տվյալներ են ստացվել, որ ՀՀ նախկին վարչապետ Հովիկ Աբրահամյանին փաստացի պատկանող, Ամբիկ Գևորգյանի անվամբ ձևակերպված` ՀՀ Արարատի մարզի Մխչյանի նախկին մեխանիկա-վերանորոգման գործարանում ապօրինի պահվում էր մեծ քանակությամբ զենք և ռազմամթերք: Այս դեպքի առթիվ ձերբակալվել է Հովիկ Աբրահամյանի եղբայրը։
