Հայաստանի ֆուտբոլի ֆեդերացիան նոր նախագահ ունի։ ԱԱԾ պետ Արթուր Վանեցյանը, որ միակ թեկնածուն էր, բաց քվեարկությամբ ընտրվել է ֆեդերացիայի նախագահի պաշտոնում, հաղորդում է Հայաստանի ֆուտբոլի ֆեդերացիան։
Սեպտեմբերի 22-ին Ֆուտբոլի ակադեմիայում կայացել է ՀՖՖ հիմնադիր ժողովը: Ժողովի սկզբում ուղերձով հանդես են եկել ՈՒԵՖԱ-ի գործադիր կոմիտեի անդամ Դավոր Շուկերը և ՖԻՖԱ-ի զարգացման ծրագրերի մենեջեր Օլիվեր Յունգը:
Այնուհետև, ՀՖՖ գործունեության մասնակի հաշվետվությունն է ներկայացրել ՀՖՖ առաջին փոխնախագահ և գործադիր տնօրեն Արմեն Մինասյանը:
Ժողովի պատվիրակները հաստատել են ՀՖՖ ՀԿ Կանոնադրությունը։
Ելույթով հանդես է եկել ՀՖՖ նախագահի թեկնածու Արթուր Վանեցյանը, որից հետո բաց քվեարկությամբ Արթուր Վանեցյանն ընտրվել է ՀՖՖ նախագահի պաշտոնում:
Ժողովի ընթացքում հաստատվել է նաև ՀՖՖ Գորկոմը հետևյալ կազմով՝ Արմեն Նիկողոսյան, Արմեն Մելիքբեկյան, Թովմաս Գրիգորյան, Կարեն Շաբոյան, Արսեն Թորոսյան, Ժաննա Անդրեասյան, Սուրեն Պապիկյան, Խաչատուր Ադումյան, Արեն Մկրտչյան, Արթուր Օհանյան, Ռուբեն Ռուբինյան, Սուրեն Աբրահամյան, Ալեն Սիմոնյան, Հիրաչ Յագան, Մարինա Թաշչյան, Հակոբ Սիմիդյան:
