Հայաստանի նախագահ Արմեն Սարգսյանը չի ստորագրել հոկտեմբերի 2-ին Ազգային ժողովի ընդունած «Ազգային ժողովի կանոնակարգ» օրենքը, որը հարուցել էր հանրության բուռն զայրույթը և հանգեցրել զանգվածային բողոքի ցույցի։
Հանրապետության նախագահը հանդես է եկել հայտարարությամբ՝ նշելով, որ սահմանադրական այդ օրենքը տարաբնույթ մեկնաբանությունների և քննարկումների տեղիք է տվել:
«Օրենքի վերաբերյալ փաստացի արձանագրվեց հանրության մի ստվար զանգվածի անհամաձայնությունը: Հավատարիմ իր մոտեցմանը՝ նախագահ Սարգսյանը հանձնարարեց իր աշխատակազմին ավելի խորն ուսումնասիրել տվյալ հարցի վերաբերյալ միջազգային փորձը, ինչպես նաև ներկայացված Օրենքի փոփոխությունները՝ իրենց հիմնավորմամբ:
Օրենքի փոփոխությունների, ինչպես նաև «Ազգային ժողովի կանոնակարգ» օրենքի գործող խմբագրության վերաբերյալ իրականացված ուսումնասիրությունները վկայում են որոշակի առերևույթ սահմանադրաիրավական խնդիրների մասին:
Հաշվի առնելով վերոգրյալը և նպատակ ունենալով ապահովել Սահմանադրության գերակայությունը՝ նախագահ Սարգսյանը որոշել է դիմել Սահմանադրական դատարան՝ ներկայացված օրենքը Սահմանադրության պահանջներին համապատասխանության հարցը որոշելու համար»։
«Ազգային ժողովի կանոնակարգ» օրենքի փոփոխությունը վերաբերում է Ազգային ժողովի նիստերի կայանալուն։ Այն սահմանում է, որ եթե կա խոչընդոտ ԱԺ նիստը շարունակելու, ԱԺ նիստը պետք է ընդհատվի, ոչ թե համարվի չկայացած: Դրանով խորհրդարանում մեծամասնություն կազմող ուժերը տեսականորեն փորձում էին խոչընդոտ ստեղծել վարչապետի հրաժարականից հետո խորհրդարանական արտահերթ ընտրությունների տանելու գործընթացը։
Հոկտեմբերի 2-ի երեկոյան վարչապետ Նիկոլ Փաշինյանի կոչով տասնյակ հազարավոր քաղաքացիներ շրջապատեցին Ազգային ժողովի շենքը և իրենց ցասումն արտահայտեցին օրենքի դեմ։
Հոկտեմբերի 2-ի իրադարձությունների մասին կարդացե՛ք՝
Ինչ է պետք իմանալ «Ազգային ժողովի կանոնակարգ» օրենքի փոփոխության մասին