Դեկտեմբերի 9-ին կայանալիք խորհրդարանական ընտրություններին մասնակցում է ինը կուսակցություն և երկու դաշինք։ ՍիվիլՆեթը նրանց նախընտրական ծրագրերից առաձնացրել է ժողովրդագրությանը և հայրենադարձությանը վերաբերող հատվածները։
ՀՅԴ
Փաստելով, որ ուշ ամուսնություններն ու ցածր ծնելիությունը երկիրը կանգնեցրել են ժողովրդագրական աղետի եզրին՝ Հայ հեղափոխական դաշնակցությունը (ՀՅԴ) խոստանում է վարել ակտիվ հայրենադարձման քաղաքականություն, նպաստել, որ հայրենիքից հեռացած համաքաղաքացիներն ու սփյուռքահայերը վերադառնան իրենց երկիր՝ քանի դեռ նրանց սերունդները չեն ուծացվել: Դաշնակցությունը նախատեսում է հայրենադարձության բարենսպաստ պայմաններ ստեղծելով՝ հայրենիքին ծառայեցնել Սփյուռքում հանգրվանածների տնտեսական, գիտական, մշակութային, մարզական ներուժը։ Արտագաղթը կանխելու նպատակով ՀՅԴ-ն առաջարկում է ստեղծել հնարավորություններ, որ բանակում ծառայած յուրաքանչյուր երիտասարդ կարողանա հոգալ իր բնակարանային ապահովվածության ու ու աշխատանքային կարիքները։
Ազգային առաջընթաց
Ազգային առաջընթաց կուսակցությունը ռազմավարական կարևորության խնդիր է համարում առաջիկա հինգ տարիներին Հայաստանի բնակչությունը կրկնապատկելը՝ ծնելիության աճի ու ներգաղթի կազմակերպման արդյունքում։ Դա ենթադրում է ոչ միայն իրավական ու տնտեսական նպաստավոր միջավայրի ստեղծում, այլև ենթակառուցվածքների արդիականացում, ինչը կհեշտացնի ներգաղթյալների ինտեգրումը Հայաստանի ուսումնական ու աշխատանքային միջավայրին։ Ազգային առաջընթացը առաջարկում է երրորդ երեխայի ծննդյան դեպքում ընտանիքին տրամադրել մինչև 3 տոկոս տոկոսադրույքով հիփոթեքային վարկ՝ 20-30 տարով։
Իմ քայլը դաշինք
Իմ քայլը դաշինքը ծրագրում է ծնելիության մակարդակը բարձրացնելու համար մշակել երիտասարդ ընտանիքներին բնակարանով ապահովելու նախագծեր։ Ծրագրում նշվում է՝ առաջիկա քսան տարիներին Հայաստանի բնակչության թիվը պետք է կրկնապատկվի, ու որպես այս խնդրի լուծման կարևորագույն միջոց դիտարկվում է երկրից տեսանելի արտագաղթի դադարեցումը, հայրենադարձության հարաճուն գործընթացը, ծնելիության աճը։ Իմ քայլը մտադիր է մշակել հայրենադարձության կազմակերպման ծրագրեր, որ միտված են լինելու վերջին տասնամյակներին Հայաստանից արտագաղթած քաղաքացիների բարեհաջող վերահաստատմանը Հայաստանում։
Սասնա ծռեր
Սասնա ծռեր կուսակցությունը խոստանում է բարենպաստ օրենսդրական, սոցիալ-տնտեսական ու սոցիալ մշակութային պայմաններ ստեղծել հայրենադարձների համար։ Կուսակցությունը մտադիր է մշակել ու իրագործել ծնելիության խրախուսման ու մայրության, մանկության խնամքի ծրագիր՝ բազմապատիկ ավելացնելով ոլորտում առկա ֆինանսավորման ծավալը։
Լուսավոր Հայաստան
Լուսավոր Հայաստան կուսակցությունն իր նախընտրական ծրագրում կարևորում է ժողովրդագրական անվտանգությունը՝ խոստանալով բարեփոխումներ՝ միտված ժողովրդագրական քաղաքականության մշակմանն ու իրականացմանը։
Բարգավաճ Հայաստան
Բարգավաճ Հայաստան կուսակցությունն առաջարկում է բարձրացնել առաջին և երկրորդ երեխայի ծննդյան միանվագ նպաստի չափը, իսկ երրորդ և հաջորդ երեխաների աջակցության չափը կտրուկ ավելացնել։ ԲՀԿ-ն մեծամասնություն ունենալու դեպքում ծրագրում է ձեռնամուխ լինել մեծ հայրենադարձության ծրագրի կայացմանը՝ իրականացնելով միջոցառումների համալիր ծրագիր։ Հանրապետությունից արտագաղթած ու իրենց տները կորցրած հայրենակիցներին ԲՀԿ-ն առաջարկում է վերադարձի դեպքում անվճար հողատարածք տրամադրել՝ բնակարաններ կառուցելու համար։
***
Մենք դաշինքի, ինչպես նաև Հայաստանի հանրապետական, Քաղաքացու որոշում սոցիալ-դեմոկրատական, Քրիստոնեա-ժողովրդական վերածնունդ, Օրինաց երկիր կուսակցությունների նախընտրական ծրագրերում ժողովրդագրությանը վերաբերող դրույթներ չկան։
Մկրտիչ Կարապետյան
Լուսանկարը՝ Ֆոտոլուրի
Կարդացե՛ք նաև՝
Հանքարդյունաբերություն․ ինչ են խոստանում քաղաքական ուժերը
