ԱՄՆ նախագահի ազգային անվտանգության հարցերով խորհրդական Ջոն Բոլթոնը Թվիթերում գրառում է արել նախօրեին Նիկոլ Փաշինյանի հետ հեռախոսազրույցի մասին։
«Երեկ ես զանգեցի Հայաստանի վարչապետ Փաշինյանին շնորհավորելու նրան վերանշանակվելու կապակցությամբ և ողջունելու Հայաստանի ժողովրդին դեկտեմբերին կայացած ազատ և արդար ընտրությունների համար։ ԱՄՆ-ը աջակցում է Հայաստանի բարգավաճ ապագան երաշխավորելու նրա ջանքերին»,- գրել է Բոլթոնը։
I called Prime Minister Pashinyan of Armenia yesterday to congratulate him on his re-appointment and applaud the Armenian people on free and fair elections in December. The U.S. supports his efforts to secure a prosperous future for Armenia.
— John Bolton (@AmbJohnBolton) January 24, 2019
Հունվարի 23-ին վարչապետ Փաշինյանը տեղեկացրել էր, որ հեռախոսազրույց է ունեցել Բոլթոնի հետ։
«Քննարկեցինք տարածաշրջանային իրավիճակին և երկկողմ հարաբերություններին վերաբերող հարցեր: Թե՛ պարոն Բոլթոնը, թե՛ ես ընդգծեցինք հայ-ամերիկյան հարաբերությունների կարևորությունը մեր կառավարությունների համար: Պայմանավորվեցինք շարունակել քննարկումները մեր հարաբերությունների հետագա զարգացման շուրջ։ Հ.Գ. Արցախի հարցին անդրադարձ չի եղել»,- գրել էր Փաշինյանը:
Մարիա Եղիազարյան