Հավաքական անվտանգության պայմանագրի կազմակերպության (ՀԱՊԿ) օպերատիվ կառավարման հարցում վակուոում չկա՝ նոր գլխավոր քարտուղարի ընտրության շուրջ տարաձայնությունների պատճառով․ այսպիսի հայտարարություն է արել Կրեմլի խոսնակ Դմիտրի Պեսկովը։
«Ոչ Կրեմլում, ոչ ՀԱՊԿ-ի մյուս անդամների շրջանում չկա հուսալքություն, ոչ էլ՝ կառավարման վակուում, քանի որ, գիտեք, այնտեղ աշխատում է գլխավոր քարտուղարի պաշտոնակատարը, նա օտար մարդ չէ և կատարելու է պարտականությունները, մինչև պարզվի նոր գլխավոր քարտուղարի հետ կապված իրավիճակը»,- լրագրողներին ասել է Պեսկովը։
Վերջինս հաստատել է՝ անդամների միջև կան որոշ տարաձայնություններ, որոնք «ներկայում կարգավորվում են, գործընթացը շարունակվում է»։
***
Ռուսական «Կոմերսանտ» թերթը գրել է, որ Հավաքական անվտանգության պայմանագրի կազմակերպությունն առաջիկա տարում, հնարավոր է՝ մնա առանց լիարժեք գլխավոր քարտուղարի։ Այդ պաշտոնում Բելառուսի ներկայացուցիչ Ստանիսլավ Զասի նշանակումը ձգձգվում է Հայաստանի վարչապետ Նիկոլ Փաշինյանի անդրդվելիության պատճառով, որը ցանկանում է իր թեկնածուին հաստատել։
ՀԱՊԿ նախկին գլխավոր քարտուղար Յուրի Խաչատուրովը ՀՀ-ում հարուցված քրեական գործի շրջանակում պաշտոնանկ է արվել անցյալ տարվա նոյեմբերի սկզբին: ՀԱՊԿ գլխավոր քարտուղարի պարտականությունները ստանձնել է Խաչատուրովի տեղակալ Վալերի Սեմերիկովը։ Բելառուսը պնդում է, որ կազմակերպության ղեկավարումը պետք է ստանձնի իր ներկայացուցիչը։ Պաշտոնական Երևանը պնդում է, որ մինչև 2020 թվականը ՀԱՊԿ նոր գլխավոր քարտուղար պետք է լինի Հայաստանի ներկայացուցիչը։
Կարդացե՛ք նաև՝
ՀՀ-ն չի հերքում, ՀԱՊԿ-ում տեղյակ չեն, որ գլխավոր քարտուղար կարող է դառնալ Բելառուսի թեկնածուն
ՀԱՊԿ գլխավոր քարտուղարի նշանակման հարցը կարելի է լուծել սահմանափակ կազմով, հայտարարում է Մինսկը
