«Ինչքան հասկացա, այդ ակցիայի կազմակերպիչները Սաշիկ Սարգսյանի կողմնակիցներն են: Հիմա, օրինակ, Սերժ Սարգսյանի որոշ կողմնակիցներ մեզ մեղադրում են, որ Սերժ Սարգսյանին չենք ձերբակալել, Սաշիկ Սարգսյանի կողմնակիցները մեզ մեղադրում են, որ այս չենք արել, այն չենք արել: Խորհուրդ եմ տալիս, ոչ մեկը թող չնյարդայնանա, բոլորի պատասխանատվության պահը կգա՝ նրանց, ովքեր Հայաստանի Հանրապետության օրենքով սահմանված կարգով պատասխանատվության ենթակա արարք են թույլ տվել: Ցանցերը բռնած՝ փողոցներով վազենք, մարդ բռնե՞նք: Այդպիսի նպատակ մեր առաջ դրված չէ»,- այսօր Հայաստանի ազգային ագրարային համալսարանից դուրս գալուց հետո լրագողների հետ ճեպազրույցում ասաց վարչապետ Նիկոլ Փաշինյանը՝ անդրադառնալով իր դեմ կազմակերպված ֆլեշմոբի մասին հարցին:
Armtimes-ի հաղորդմամբ՝ լրագրողը նկատեց, որ «Սուտ Նիկոլ» կարգախոսով ֆլեշմոբի մասնակիցներն իրեն մեղադրում են խոստումները չկատարելու, մասնավորապես Սաշիկ Սարգսյանի հայտնի «50/50» երևույթը չբացահայտվելու համար: «Ես ուզում եմ հասկանալ՝ ավարտվե՞լ է ինչ-որ բան, հիմա մենք ինչ-որ մի վավերագրական ֆիլմի մեջ ենք, որտեղ արդեն գրվել է՝ ֆիլմի վերջը, և էկրանը մգացե՞լ է»,- արձագանքեց Նիկոլ Փաշինյանը՝ առաջարկելով հեղափոխության ընթացքում իր տված խոստումները կետ առ կետ գույքագրել՝ տեսական խոսակցությունից խուսափելու համար:
Ինչ վերաբերում է արագաչափերից չհրաժարվելուն, վարչապետը պարզաբանեց. «Ես ԱԺ-ում էլ ասացի. մի կողմից մեզ մեղադրում են, թե ոչ մի փաստարկ չեք լսում, իսկ այն դեպքերում, երբ լսում ենք, մեզ ասում են՝ դուք խոստումը չեք կատարել»:
Նիկոլ Փաշինյանն անդրադարձավ նաև Սաշիկ Սարգսյանի արտերկրում գտնվելու փաստի մասին հարցին, երբ Սարգսյանի որդին ասել էր, թե նա ոչ թե բուժման, այլ հանգստանալու նպատակով է մեկնել: «Քրեական գործ է հարուցված, մեղադրանք է առաջադրված, և քննիչը հնարավորություն է տվել, որ մեղադրյալը Հանրապետությունից դուրս գա ինչ-ինչ նկատառումներով: Այդ որոշումը ես չեմ կայացրել, և եթե պարզվի, որ այդ որոշումը սխալ է դատավարական առումով ու որևէ մեկին պետք է հնարավորություն տա պատասխանատվությունից խուսափել, այդ թույլտվությունը տված անձինք խստագույն պատժի կենթարկվեն»,- վստահեցրեց նա:
