ԵԱՀԿ Մինսկի խմբի համանախագահներ Էնդրյու Շոֆերը (ԱՄՆ), Իգոր Պոպովը (Ռուսաստան), Ստեֆան Վիսկոնտիին (Ֆրանսիա), ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպշիկը մայիսի 27-30 տարածաշրջան կատարած այցի արդյունքներով հայտարարություն են ընդունել։
Այցի նպատակն էր, ըստ հաղորդագրության, գնահատել շփման գծում և պետական սահմանին ներկա իրավիճակը, ինչպես նաև շարունակել Ադրբեջանի նախագահի և ՀՀ վարչապետի միջև մարտի 29-ին Վիեննայում, այնուհետ ԱԳ նախարարների միջև ապրիլի 15-ին Մոսկվայում կայացած քննարկումները։
Կողմերի խնդրանքով համանախագահները ներկայացրել են կոնկրետ առաջարկներ կարգավորման գործընթացում հետագա քայլերի վերաբերյալ, այդ թվում՝ մարդասիրական և անվտանգային միջոցառումների հետ կապված։ Հայաստանի և Ադրբեջանի արտգործնախարարները ընդունել են համանախագահների առաջարկը՝ մոտ ապագայում հանդիպել Մինսկի խմբի հովանու ներքո։
Համանախագահները խորը մտահոգություն են հայտնել վերջին կորուստների առնչությամբ և կոչ արել կողմերին ցուցաբերել առավելագույն զսպվածություն՝ հետագա լարվածությունից խուսափելու համար։