Վաշինգտոնում կայացել է ԱՄՆ նախագահի՝ ազգային անվտանգության հարցերով խորհրդական Ջոն Բոլթոնի և Ադրբեջանի արտաքին գործերի նախարար Էլմար Մամեդյարովի հանդիպումը։
Ինչպես հաղորդում է ադրբեջանական Turan գործակալությունը, հանդիպման ընթացքում տեղի է ունեցել կարծիքների ինտենսիվ և շարունակական փոխանակում մի շարք թեմաներով, այդ թվում՝ ղարաբաղյան հակամարտության կարգավորման շուրջ բանակցությունների վերաբերյալ։
Մամեդյարովն ու Բոլթոնը քննարկել են երկկողմ օրակարգին առնչվող հարցեր, տնտեսական կապերը, տրանսպորտային և տնտեսական նախագծերը։
Հունիսի 20-ին Վաշինգտոնում կայանալու է Հայաստանի և Ադրբեջանի արտաքին գործերի նախարարների հանդիպումը։
Ջոն Բոլթոնն ավելի վաղ գրառում էր արել Թվիթերում՝ երկու երկրների նախարարների հետ առաջիկա հանդիպման մասին։