Նիկոլ Փաշինյանը այցելում է Վիետնամ

Հուլիսի 4-7-ը պաշտոնական այցով Վիետնամի Սոցիալիստական Հանրապետություն է այցելում Հայաստանի վարչապետ Նիկոլ Փաշինյանը:

Հայաստանի ղեկավարներից Վիետնամ այցելել է երրորդ նախագահ Սերժ Սարգսյանը 2012-ի հունիսին: Վիետնամ այց են տվել նաև Հայաստանի փոխնախագահ (նման պաշտոն ՀՀ-ում եղել է 1991-1996 թթ.) Գագիկ Հարությունյանը 1992-ի դեկտեմբերին, ինչպես նաև արտգործնախարարներ Վարդան Օսկանյանը՝ 2002-ի օգոստոսին և Էդվարդ Նալբանդյանը՝ 2012-ի փետրվարին:

Վիետնամից միակ բարձրաստիճան պաշտոնյան, որն այցելել է Հայաստան, եղել արդարադատության նախարար Հա Հունգ Կուոնը՝ 2015-ի հոկտեմբերին:

Երկու երկրների միջև դիվանագիտական հարաբերություններ հաստատվել են 1992թ. հուլիսի 14-ին: Հայաստանը մայրաքաղաք Հանոյում ունի դեսպանություն 2013-ից: Այդ տարվա օգոստոսից դեսպանը Ռաիսա Վարդանյանն է: Շուտով նրան փոխարինելու է նորանշանակ դեսպան Վահրամ Կաժոյանը:

Վիետնամի դեսպանը Երևանում համատեղության կարգով է, նստավայրը՝ Մոսկվայում:

Վիետնամի մասին՝ մի քանի փաստեր

Վիետնամը Հայաստանից տարածքով մեծ է ավելի քան 10 անգամ, բնակչությամբ՝ 30 անգամ: Երկրի տարածքը 329,247 քառակուսի կիլոմետր է, բնակչությունը՝ 92 միլիոն։

Հյուսիսից սահմանակից է Չինաստանի, արևմուտքից՝ Լաոսի ու Կամբոջայի հետ, իսկ արևելքում և հարավում՝ Հարավչինական ծովն է։ Մայրաքաղաքը Հանոյն է։

Հիմնական լեզուն վիետնամերենն է, հիմնական կրոնը՝ բուդդայականությունը, դրամական միավորը՝ դոնգը։

Վիետնամը և վիետնամցիներին Հայատանում լավ գիտեն, ավելի ճիշտ՝ լավ գիտեին խորհրդային տարիներին: Խորհրդային Միությունն ու Վիետնամը բարեկամ պետություններ էին: Խորհրդային Հայաստանում ուսանել են բազմաթիվ վիետնամցի ուսանողներ:

Այսօր Վիետնամը միակուսակցական պետություն է, որտեղ իշխում է Կոմունիստական կուսակցությունը։ Հարավարևելյան Ասիայի ամենազարգացող տնտեսություններից մեկն ունի և արդեն մյուս տարվանից համարվելու է զարգացած պետություն։

1975-ին երկրի հյուսիսն ու հարավը միավորվեցին։ Այս միացմանը նախորդել էր երեսուն տարիների պատերազմը, որ կումունիստները մղել էին նախ՝ Ֆրանսիայի տիրապետության, ապա՝ Հարավային Վիետնամի և նրան աջակցող ԱՄՆ-ի դեմ։

Վիետնամի խոշորագույն քաղաքը Հո Շի Մինն է՝ ավելի քան 8 միլիոն բնակչությամբ։ 1955-75թթ․ եղել է Հարավային Վիետնամի մայրաքաղաքը և կրել Սայգոն անունը։ Հո Շի Մինը երկրի տնտեսական, արդյունաբերական ու տուրիստական մայրաքաղաքն է, երկրի ամբողջ ՀՆԱ-ի մոտ 20 տոկոսը, և արդյունաբերական արտադրանքի գրեթե 30 տոկոսը ստեղծվում է այս քաղաքում։

Երկրորդ խոշոր քաղաքը Հանոյն է՝ ավելի քան 7 միլիոն բնակչությամբ։ 1954-76թթ․ եղել է Հյուսիսային Վիետնամի, իսկ 1976-ից՝ միասնական Վիետնամի մայրաքաղաքը։

Հայաստան-Վիետնամ տնտեսական կապերը

Վերջին տարիներին երկու երկրների միջև առևտրաշրջանառությունը աճում է, ճիշտ է՝ մեկ ուղղությամբ: 2018-ին Հայաստանը Վիետնամ է արտահանել ընդամենը 566 հազար դոլարի արտադրանք, մինչդեռ նույն տարում ներմուծումը կազմել է ավելի քան 46 միլիոն դոլար:

Ում հետ է հանդիպելու Փաշինյանը Հանոյում

Պաշտոնական այցի ընթացքում Նիկոլ Փաշինյանը հանդիպելու է վիետնամցի իր գործընկեր Նգույեն Սուան Ֆուքի հետ: Բանակցությունների արդյունքում ստորագրվելու է երկու համաձայնագիր, ինչպես նաև արվելու է համատեղ հայտարարություն լրատվամիջոցների համար: Ստորագրվելիք երկու համաձայնագրերը վերաբերելու են կրթության և զբոսաշրջության ոլորտներին:

Փաշինյանը հանդիպելու է նաև Վիետնամի Ազգային ժողովի նախագահի, Առևտրի պալատի ղեկավարության ու վիետնամցի գործարարների հետ: Ապա Հանոյում՝ ՀՀ դեսպանությունում, տեղի է ունենալու հանդիպում «Վիետնամ-Հայաստան բարեկամություն» կազմակերպության ներկայացուցիչների հետ:

Ովքեր են ուղեկցում Փաշինյանին

Հայաստանի վարչապետին ուղեկցում են տիկինը՝ Աննա Հակոբյանը, էկոնոմիկայի նախարար Տիգրան Խաչատրյանը, բարձր տեխնոլոգիական արդյունաբերության նախարար Հակոբ Արշակյանը, պաշտոնատար այլ անձինք:

Փաշինյանի՝ Վիետնամ այցը լուսաբանում են 5 լրատվամիջոցներ՝ Հանրային հեռուստատեսությունը, Հանրային ռադիոն, «Ազատություն» ռադիոկայանը, «Հայմ.ամ» լրատվական կայքը և ՍիվիլՆեթը:

Թաթուլ Հակոբյան

Նագփուր, Հնդկաստան