Հայաստանում հաշմանդամություն ունեցող անձանց համար ապահովված չեն մատչելի պայմաններ, ինչը լուրջ խոչնդոտ է նրանց սոցիալական ներառման համար: Այս մասին նշվում է Աշխատանքի և սոցիալական հարցերի նախարարության նախագծում։
Կառավարությունն առաջարկում է իրավիճակը շտկել։ Այդ նպատակով մշակվել է «Հաշմանդամություն ունեցող անձանց իրավունքների մասին» ՀՀ օրենքի նախագիծ և հանրային քննարկման դրվել e-draft.am կայքում։
«Օրենքի նախագծով սահմանվում է դրույթ Հաշմանդամություն ունեցող անձանց հարցերով զբաղվող ազգային հանձնաժողովի վերաբերյալ: Հանձնաժողովի նպատակներից են հաշմանդամություն ունեցող անձանց սոցիալական ներառման գործընթացի վրա համապատասխան իրավական ակտերի ներգործության աստիճանի և կիրառելիության ուսումնասիրությունը և վերլուծությունը»,- ասվում է նախագծում։
Նախագծում կան մեխանիզմներ հաշմանդամության հիմքով խտրականությունը արգելելու նպատակով. «Ունիվերսալ դիզայնի սկզբունքներին համաձայն մատչելիությունն ապահովելու անհնարինության դեպքում սահմանվել են դրույթներ խելամիտ հարմարեցումների համար: Մասնավորապես, աշխատավայրում կամ ուսումնական հաստատությունում հաշմանդամություն ունեցող անձի կամ նրա օրինական ներկայացուցչի դիմումի հիման վրա կատարվում է խելամիտ հարմարեցում՝ գործատուի կամ ուսումնական հաստատության ղեկավարի հետ ինտերակտիվ երկխոսության միջոցով»։
Գևորգ Թոսունյան
