Պետական եկամուտների կոմիտեի նախկին նախագահ, ֆինանսների նախկին նախարար Գագիկ Խաչատրյանը կալանավորվեց։ Քիչ առաջ կալանավորման որոշում կայացրեց Երևան քաղաքի ընդհանուր իրավասության դատարանի դատավոր Արտուշ Գաբրիելյանը։ Գագիկ Խաչատրյանն այսօր ներկա է եղել դատական նիստին։
Դատարանից դուրս գալով՝ Խաչատրյանի պաշտպան Երեմ Սարգսյանը հայտարարեց, որ կալանավորումը ապօրինի է։ Նա պնդեց, որ վեց ամիս նախաքննություն է ընթացել, և Խաչատրյանը երբևէ չի փորձել փախուստի դիմել․
«Ձերբակալումը ապօրինի էր և ոչ իրավաչափ։ Մենք արդեն երրորդ օրն է՝ խորությամբ հակափաստարկներ ենք ներկայացնում, որոնք գործի նյութերի և մեղադրանքի վերաբերյալ են, դրանց վերաբերյալ որևէ հիմնավոր փաստ չի ներկայացվել։ Ստատվեց, որ երեք օրվա քննությունը, ընդամենը ձևական բնույթ էր կրում»,- ասաց Երեմ Սարգսյանը։
Փաստաբանը հավելեց, որ դատարանը ապօրինի է համարել Գագիկ Խաչատրյանին ձերբակալելու քննիչի որոշումը։
Երեմ Սարգսյանը մանրամասնեց, որ քրեական գործում խոսք կա շուրջ 200 մլն դրամ վատնման մասին։ Նա պատրաստվում է բողոքարկել առաջին ատյանի դատարանի որոշումը։
Հարց հնչեց, թե արդյոք քաղաքական ենթատեքստ տեսնում է փաստաբանը։ Երեմ Սարգսյանը վերահաստատեց իր նախկին դիրքորոշումը, որ «այս պահին որևէ քաղաքական ենթատեքստ չկա»։ Նա դժվարացավ ասել, թե արդյոք դատարանի որոշման վրա ազդեցություն եղել է իշխանության որևէ օղակի կողմից։
Գագիկ Խաչատրյանին կալանավորելու միջնորդություն էր ներկայացրել Ազգային անվտանգության ծառայությունը, որն էլ նրան ձերբակալել էր օգոստոսի 27-ին։ Խաչատրյանը մեղադրվում է պաշտոնեական դիրքի չարաշահման և առանձնապես խոշոր չափերի վատնում կատարելու համար։ Մինչ այս նրա պաշտպան Երեմ Սարգսյանը հայտնել է, որ դրվագներից մեկով աշխատանքի են գրանցվել ՊԵԿ աշխատակիցներ, որոնք չեն այցելել աշխատավայր, սակայն նրանց աշխատավարձը դուրս է գրվել ու վատնվել։
Մինչ այս Երևան քաղաքի ընդհանուր իրավասության դատարանը որոշել էր կալանավորել Գագիկ Խաչատրյանի եղբորորդուն՝ Կարեն Խաչատրյանը, ով նախկինում զբաղեցրել է ՊԵԿ ներքին անվտանգության վարչության պետի պաշտոնը:
Գևորգ Թոսունյան
