Պաշտպանության նախարար Դավիթ Տոնոյանը լիբանանցի իր պաշտոնակից Էլիաս Բու Սաաբի հետ այսօրվա մամուլի ասուլիսին անդրադարձավ ադրբեջանական կողմի՝ օրերս արած առաջարկին՝ փոխանակել գերիներին և պատանդներին «բոլորը բոլորի դիմաց» սկզբունքով։
«Չեմ բացառում, բայց դա Լեռնային Ղարաբաղի սուվերեն որոշման խնդիրն է»,- ընդգծեց Տոնոյանը, անդրադառնալով Ադրբեջանի ռազմագերիների, պատանդների և անհետ կորածների հարցերով պետական հանձնաժողովի առաջարկին։
Տոնոյանը տեղեկացրեց, որ հանդիպում է ունեցել Կարմիր խաչի միջազգային կոմիտեի հայաստանյան ներկայացուցչի հետ, և իրեն պաշտոնապես փոխանցվել է ադրբեջանական կողմի առաջարկը։
«Կան քննարկման ենթակա որոշ խնդիրներ, որոնք բացահայտել չեմ կարող։ Հավելյալ աշխատանք է պահանջվում որոշ տեղեկատվության ճշգրտման համար, և երբ ստանանք այդ ճշգրտված տեղեկությունը Ադրբեջանից, կարձագանքենք։ Մենք սկզբունքորեն դեմ չենք ՀՀ քաղաքացիներին վերադարձնելու իրենց տները և աջակցելու ենք այդ գործընթացին»,- հայտարարեց ՀՀ ՊՆ ղեկավարը։
Փոխանակման մասին ճշգրտող հարցին ի պատասխան՝ Տոնոյանը նշեց․ «Մենք երբևիցե փոխանակման ճանապարհով չենք․․․, սա մաքուր հումանիտար գործողություն է։ Եվ ես տեսնում եմ Հայաստանի Հանրապետության քաղաքացիների և Ադրբեջանի քաղաքացիների կամ այլ երկրի քաղաքացիների, որոնք գտնվում են հիմա Լեռնային Ղարաբաղում, տարանջատում։
Ես փոխանակման դիտանկյունից չեմ դիտարկում, և դա ճիշտ մոտեցում չէ առնվազն պաշտպանության նախարարի կողմից։ Ես աշխատում եմ, որպեսզի վերադարձնեմ իմ քաղաքացիներին Հայաստան»,- եզրափակեց պաշտպանության նախարարը։
«Չեմ բացառում, բայց դա Լեռնային Ղարաբաղի սուվերեն որոշման խնդիրն է»,-
***
Ադրբեջանն օրերս առաջարկել է Հայաստանին փոխանակել գերիներին ու պատանդներին «բոլորը բոլորի դիմաց» սկզբունքով, և ապագայում վերադարձնել գերիներին ու պատանդներին, ինչպես նաև զոհվածների դիերը երեք օրվա ընթացքում՝ միջազգային կազմակերպությունների միջնորդությամբ։
Ստելլա Մեհրաբեկյան