Ուսուցիչների մեկ դրույքի նվազագույն աշխատավարձի չափը այլևս կախված չի լինի սովորողների թվից. այսօր կառավարության նիստի ընթացքում ընդունվեց հանրակրթական ուսումնական հաստատությունների ֆինանսավորման նոր բանաձևը։
Կրթության, գիտության, մշակույթի և սպորտի նախարար Արայիկ Հարությունյանը նշեց, որ, ըստ գործող բանաձևի, ուսումնական հաստատությունների տարեկան հասանելիք գումարը կախված է սովորողների թվից։ Ըստ Հարությունյանի՝ այս մոտեցումը որդեգրվել է 2001-ից՝ խթանելու դպրոցների միջև մրցակցությունը։ Սակայն հաշվի չի առնվել այն,որ դպրոցների զգալի մասը, որոնք միակն են բնակավայրում և սովորողների թիվը պայմանավորված է դպրոցի սպասարկման տարածքի բնակիչների թվով, նրանք մրցակցությունից դուրս են։ Այս պարագայում աշակերտական համակազմ ունեցող դպրոցներին հատկացվող գումարը չի բավականացնում ծախսերը հոգալու, և վերաբաշխումների անհրաժեշտություն է առաջանում։
Նոր բանաձևով կկատարվեն մի շարք փոփոխություններ։ Փոքր աշակերտական համակազմ ունեցող, թերհամալրված դպրոցների հասանելիք գումարը հաշվարկելիս հիմք կընդունվի նաև դասարանների թիվը, ինչով պայմանավորված է ծախսերի մեծ մասը, ուսուցիչների վարձատրությունը։
Ըստ Հարությունյանի՝ թերհամալրված դպրոցներն են տարրական դպրոցում՝ մինչև 72 սովորող, հիմնական դպրոցում՝ 162 սովորող, միջնակարգ դպրոցում՝ 207 սովորող, վարժարանում և ավագ դպրոցում՝ 135 սովորող։
2020-ի պետական բյուջեի հաշվարկների հիմքում դրվել է ուսուցչական 1 դրույքի 108 հազարը, ինչը կարող է հասնել 125 հազարի որպես նվազագույն աշխատավարձ։
Տարեկան աշխատավարձի 10 տոկոսի բարձրացումը շարունակելու դեպքում, ըստ Հարությունյանի, նվազագույն աշխատավարձի չափը կհասնի 1 շնչի հաշվով ՀՆԱ-ի մակարդակի։
Նախագծով վերանալու են վերաբաշխումները, քանի որ յուրաքանչյուր դպրոցի համար կապահովվի նվազագույն ծախսերին համապատասխան ֆինանսավորում։ Կհանվեն դասագրքերից համար վարձավճարի փոխհատուցման և տարրական դասարաններին սնունդով ապահովման ծախսերը, քանի որ պետական բյուջեով նմանատիպ ծախսեր նախատեսված են նաև առանձին միջոցներով։
Գեղեցիկ Ոսկանյան