Երևանի նախկին քաղաքապետը 2009 թվականին ստացել է առանձնապես խոշոր կաշառք՝ բազմաբնակարան շենքի շինարարության վերսկսման հետ կապված խոչընդոտները վերացնելու ու հարկայնությունն ավելացնելու համար․ այս մասին հաղորդագրություն է տարածել ԱԱԾ-ի մամուլի ծառայությունը:
«ՀՀ ազգային անվտանգության ծառայությունը, որպես առաջնահերթություն դիտարկելով կոռուպցիայի տարաբնույթ դրսևորումների դեմ ուղղված անզիջում պայքարը, օրենքով իրեն վերապահված գործառույթների շրջանակներում ձեռնարկված օպերատիվ-հետախուզական միջոցառումների և քննչական գործողությունների արդյունքում բացահայտել է առանձնապես խոշոր չափի կաշառք ստանալու դեպք:
Մասնավորապես, փաստական տվյալներ են ստացվել, որ 2009թ. Երևան համայնքը ղեկավարող պաշտոնատար անձը քաղաքում բազմաբնակարան շենք կառուցապատող կազմակերպության հիմնադիրից՝ նրա օգտին գործողություններ կատարելու, կասեցված շինարարության վերսկսման հետ կապված խոչընդոտները վերացնելու, հարկայնությունն ավելացնելու համար, իր եղբոր միջնորդությամբ 2009թ. ընթացքում մաս-մաս, այդ թվում նաև քաղաքապետարանի պաշտոնատար անձանց միջոցով, ստացել է առանձնապես խոշոր՝ 75000 ԱՄՆ դոլարի չափի կաշառք, իսկ խնդիրներին վերջնական լուծում տալու նպատակով պահանջել է նաև կառուցվող շենքում Երևանի քաղաքապետարանի կարիքների համար հատկացնել 200 մ² մակերեսով բնակարան:
ՀՀ քրեական օրենսգրքի համապատասխան հոդվածով առերևույթ հանցագործության դեպքի առթիվ ՀՀ ԱԱԾ քննչական դեպարտամենտում հարուցվել է քրեական գործ, կատարվում է նախաքննություն», – ասված է հաղորդագրության մեջ:
ԱԱԾ-ն չի հստակեցնում Երևան համայնքը ղեկավարող պաշտոնատար անձի ինքնությունը: 2009 թվականին Երևանում քաղաքապետ է փոխվել: Այդ թվականին մինչև մարտի 4-ը քաղաքը ղեկավարել է Երևանդ Զախարյանը, որից հետո մայրաքաղաքի ՏԻՄ ընտրությունների արդյունքում քաղաքապետ է դարձել ՀՀԿ-ական Գագիկ Բեգլարյանը:
#ՍիվիլՆեթ #Լուրեր
