Մենք նպատակ չունենք դառնալ ժողովրդի հայր․ կառավարության այսօրվա նիստին հայտարարեց վարչապետ Նիկոլ Փաշինյանը՝ անդրադառնալով աղմուկ բարձրացրած «Հայաստանն իմ օջախն է, ժողովուրդը՝ իմ ընտանիքը» կարգախոսին:
«Մեկնաբանություններ եղան, թե այդ կարգախոսի գաղափարախոսությունն այն է, որ երկրի ղեկավարն ստանա ժողովրդի հոր կարգավիճակ: Մենք նման նպատակ չունենք: Ուզում են հիշեցնել, որ ընտանիքում միայն հայրեր չէ, որ գոյություն ունեն: Գոյություն ունեն զավակներ, եղբայրներ, քույրեր, ու մենք մեր գաղափարական տրամաբանությունը վաղուց ենք դրել»,- ասաց վարչապետը:
Փաշինյանն ասաց, որ իր թիմը կառավարության ղեկավարի գործառույթը պատկերացնում է բացառապես ՀՀ քաղաքացիներին ծառայության ձևով․ «Մենք ժողովրդի հայր կամ չգիտեմ՝ ինչ լինելու հավակնություն չունենք, որովհետև ժողովրդին համարում ենք մեր գործատուն: Մենք սպասավորներ ենք ու պետք է մեր սպասավորությունն իրականացնենք մաքսիմալ անկեղծ, արդյունավետ ու մինչեւ վերջ»:
«Անտարես» հրատարակչությունը կառավարությունից հանձնարարություն էր ստացել Հանրապետությունում գտնել արտաքին գովազդի վահանակներ, բանակցել նրանց տերերի հետ, որպեսզի դրանց վրա տեղադրվեն գովազդներ՝ «Հայաստանն իմ օջախն է, ժողովուրդը՝ իմ ընտանիքը» գրառմամբ:
Կառավարության այս քայլը լուրջ քննարկման նյութ դաձավ սոցիալական ցանցերում։ Գործընթացն իրականացվել էր առանց մրցույթի։ Գինը կազմել էր գրեթե 50 միլիոն դրամ կամ ավելի քան 100 000 դոլար։
#CivilNet #News
