Էդմոն Մարուքյան․ «Նիկոլ Փաշինյանի աչքին բոլորը «Աշոտյան» են թվում»

Լուսավոր Հայաստան կուսակցության նախագահ Էդմոն Մարուքյանն արձագանքել է վարչապետ Նիկոլ Փաշինյանի՝ Կապանում այսօր հրավիրված ասուլիսին իր հասցեին հնչեցրած քննադատությանը։ Փաշինյանը, անդրադառնալով կառավարությանն ու իշխող ուժին ուղղված Էդմոն Մարուքյանի ու նրա կուսակցության քննադատություններին, ասել էր․

«Ով քաղաքական կրեդիտ կորցնելուց է խոսում, թող տանձից, խնձորից, ուրիշ բաներից խոսի: Եթե պարոն Մարուքյան շարունակելու է տեղը չբերել, ինքը հայտնվելու է Արմեն Աշոտյանի դերում, ինքը թող ընտրի, մենք որևէ պրոբլեմ չունենք: Հերիք է՝ մեր համեստությունը չարաշահեն»:

Էդմոն Մարուքյանն այս հայտարարությանն արձագանքել է իր ֆեյսբուքյան էջում․ 

«Ի պատասխան Նիկոլ Փաշինյանի դարակազմիկ մտքերի

Նիկոլ Փաշինյանը սուպերվարչապետական բարձունքներից տեղը չի բերում, որ արդեն իսկ հասցրել է հոգեպես կապվել ՀՀԿ-ի հետ և բոլորը աչքին «Աշոտյան» են թվում։ Նիկոլ Փաշինյանը տեղը չի բերում, որ իր թեթև ձեռքով քաղաքական դիսկուրսի որակը իջեցվել է «գողական ենթամշակույթին» բնորոշ «տեղը բերելու և չբերելու» մակարդակին։ Հեղափոխական էյֆորիայի ազդեցությամբ 73 տոկոս ձայն հավաքած վարչապետը տեղը չի բերում, որ «ժողովուրդ» եզրույթը չի սահմանափակվում միայն իր ընտրողներով։ Փաշինյանն այդպես էլ չկարողացավ տեղը բերել, որ այս ամբողջ պատմությունը Սերժ Սարգսյան անձի մասին չէ, այլ՝ արատավոր համակարգի, որը ինքը չի կարողանում և չի ուզում փոխել։ Այս պարագայում անձերը երկրորդական են, եթե համակարգը չի փոխվում, ապա անհատները հայտնվում են նույն հարթության մեջ։ Եվ վերջապես, այսքան տարիների համատեղ աշխատանքից հետո, փաստացի, Նիկոլ Փաշինյանը չի կարողացել նաև ինձ տեղը բերել։ Պարո՛ն Վարչապետ, ես Էդմոն Մարուքյանն եմ, Հայաստանի երրորդ ամենամեծ քաղաքական ուժի ղեկավարը։ Մի՛ մոռացեք և ուշադրություն դարձրեք Ձեր հռետորաբանությանը:
Կհանդիպենք խորհրդարանում»:

#CivilNet #News