Որևէ մեկի նկատմամբ քաղաքական հետապնդում չի իրականացվում․ ոստիկանապետի պաշտոնակատար

Հունվարի 30-ին տեղի է ունեցել «Իմ քայլը» խմբակցության հանդիպումը ոստիկանապետի պաշտոնակատար Արման Սարգսյանի հետ, որից հետո վերջինս պատասխանեց լրագրողների հարցերին։ Սարգսյանին մի քանի անգամ հարց ուղղվեց օրեր առաջ «Ադեկվատ» միաբանության անդամների և «Վետո» շարժման հիմնադրի նկատմամբ ոստիկանության գործողությունների իրավաչափության մասին։ 

«Ոստիկանությունն իր լիազորությունների շրջանակում իրականացրել է իր գործառույթները՝ օրենքի սահմաններում»,- հայտարարեց Սարգսյանը։

Նա շեշտեց՝ ստացված օպերատիվ տեղեկությունները ստուգելու նպատակով բերման են ենթարկվում անձինք, և տեղեկությունների իսկության ստուգումից հետո ազատ են արձակվում սահմանված ժամկետում։

«Հնարավոր է նույն անձին պարբերաբար բերման ենթարկեն, նկատի չունեմ այդ չորս անձանց, այլ առհասարակ»,- ասաց ոստիկանապետի պաշտոնակատարը։ 

Հարցին, թե ինչու բերման ենթարկեցին հատուկ նշանակության վարչության աշխատակիցները, պաշտոնյան պատասխանեց․ «Որովհետև տվյալները ստացվել էին քրեական ոստիկանությունում, իսկ այդ հատուկ նշանակության աշխատակիցները քրեական ոստիկանության գլխավոր վարչության ծառայողներ են»։

Բերման ենթարկվածների նկատմամբ քաղաքական հետապնդման մասին հարցին ի պատասխան Արման Սարգսյանը նշեց, որ «ՀՀ-ում որևէ մեկի նկատմամբ քաղաքական հետապնդում չի իրականացվում, և եթե իրականացվեր, թե խոսքի, թե գործելակերպի ազատություն չէինք ունենա»։

«Որևէ հետապնդման մասին խոսք լինել չի կարող թե՛ չորս անձանց, թե՛ մնացածի առումով»,- հայտարարեց ոստիկանապետի պաշտոնակատարը։

#ՍիվիլՆեթ #Լուրեր