Վրաստանում գրանցվել է կորոնավիրուսի առաջին դեպքը։ Այս մասին Վրաստանի կառավարության աշխատակազմում ասուլիսին հայտարարել են Վրաստանի առողջապահության նախարար Եկատերինա Տիկարաձեն և երկրի Հիվանդությունների վերահսկման և հանրային առողջության ազգային կենտրոնի ղեկավար Ամիրան Գամկրելիձեն, հաղորդում է apsny.ge կայքը։
Վարակվածը մոտ 50 տարեկան տղամարդ է։ Նա մեկ շաբաթվա ընթացքում իր անձնական գործով մեկնել է Իրան՝ ընկերոջ հետ։ Նախօրեին տղամարդը Վրաստան է վերադարձել Ադրբեջանի տարածքով, սահմանին նրա մոտ ախտանշաններ են հայտնաբերվել։ Նա տեղափոխվել է Թբիլիսիի կենտրոնական ինֆեկցիոն հիվանդանոց։
«Մեզ մոտ խուճապ չկա, քանի որ ձեռնարկում ենք բոլոր միջոցները, որպեսզի Վրաստանում համաճարակ չլինի»,- ընդգծել է Տիկարաձեն, որը ճեպազրույցից առաջ հանդիպում է ունեցել վարչապետի հետ:
Վրաստանի կառավարության որոշմամբ երկու շաբաթով փակվելու է Վրաստանի եւ Ադրբեջանի սահմանը
Նախարարը նաև հայտնել է, որ Վրաստանի կառավարության որոշմամբ երկու շաբաթով փակվելու է Վրաստանի եւ Ադրբեջանի սահմանը:
Գամկրելիձեի խոսքով ՝ հիվանդի ընդհանուր վիճակը նորմալ է, նա չունի կլինիկական դրսևորումներ և բարձր ջերմություն:
Գամկրելիձեն հայտնել է, որ տղամարդը Ադրբեջանից եկել է երթուղային տաքսիով։ Առողջապահության նախարարության համապատասխան ծառայություններն արդեն սկսել են պարզել վարակվածի տեղաշարժի երթուղին, որպեսզի բացահայտեն բոլոր հնարավոր շփումները։
Լրացում
Հայաստանի առողջապահության նախարար Արսեն Թորոսյանը Ֆեյսբուքում գրել է, որ խոսել է իր վրացի պաշտոնակցի հետ։
«Քիչ առաջ խոսեցի Վրաստանի առողջապահության նախարար Եկատերինե Տիկարաձեի հետ, որպեսզի հասկանամ կորոնավիրուսով պայմանավորված իրավիճակը մեր հարևան երկրում: Նախարարի հավաստմամբ` կորոնավիրուսով ախտորոշված պացիենտի հետ շփված 4 անձինք հետազոտվել են և նրանց մոտ չի հայտնաբերվել վարակը: Նրանք 14 օր կմնան մեկուսացման մեջ»:
#CivilNet #News