Ոստիկանության 2020-2022 թթ. բարեփոխումների ռազմավարությունից հանվել է Կենտրոնական բանկի ֆինանսական դիտարկումների կենտրոնը (ՖԴԿ) ձևավորվելիք ներքին գործերի նախարարության (ՆԳՆ) կառուցվածքում ներառելու հարցը։ Այս մասին ՍիվիլՆեթի հարցմանն ի պատասխան՝ հայտնում են Կենտրոնական բանկի մամուլի ծառայությունից:
ՖԴԿ-ն ԿԲ կառուցվածքից հանելու և ձևավորվելիք ՆԳՆ կառուցվածքում ներառելու առաջարկը դժգոհություններ ու մտահոգություններ էր առաջացրել ֆինանսիստների ու տնտեսագետների շրջանում: Նրանք սա համարում են քայլ դեպի «ոստիկանական պետություն», այն դեպքում, երբ կառավարությունն այն հիմնավորում է կոռուպցիայի ու ֆինանսական հանցագործությունների դեմ պայքարի արդյունավետության բարձրացման անհրաժեշտությամբ: Թեմային ծավալուն հրապարակմամբ անդրադարձել էր ՍիվիլՆեթը:
ԿԲ-ից նշել են, որ քննարկումների արդյունքում նպատակահարմար չի համարվել ՖԴԿ մոդելի փոփոխությունը:
Նշվածը հիմնավորվել է մի շարք փաստարկներով, այդ թվում.
- Աշխարհում գոյություն ունեցող ֆինանսական հետախուզության մարմինների (ՖՀՄ) 65%-ը վարչական մոդելի մարմիններ են, և վերջին շրջանում նկատելի է իրավապահից վարչական մոդելի անցման կայուն միտում։
- Միջազգային գնահատումների վրա հիմնված փորձի տեսանկյունից անհնար է որևէ հիմնավոր եզրահանգման գալ ՖՀՄ-ի մոդելի ընտրության և դրա գործունեության արդյունավետության միջև պատճառահետևանքային կապի մասին։
- ՖԴԿ-ն ՀՀ կենտրոնական բանկի կազմում ձևավորելու հիմքում ընկած է եղել միջազգային ստանդարտներին համապատասխան գործառնական անկախությամբ և ինքնավարությամբ օժտված ազգային ՖՀՄ ստեղծելու պահանջը, ինչը ՖԴԿ-ի գործող մոդելի միջոցով լիարժեքորեն ապահովված է:
***
Ֆինանսական դիտարկումների կենտրոնը ստեղծվել է 2005-ին` որպես ԿԲ առանձնացված ստորաբաժանում: Կառույցի հիմնական գործառույթը փողերի լվացման և ահաբեկչության ֆինանսավորման դեմ պայքարի նպատակով տեղեկությունների հավաքագրումը, վերլուծությունը և փոխանակումն է:
ՖԴԿ-ն ստեղծման օրվանից ակտիվ գործունեություն չի ծավալել: ԿԲ պաշտոնական կայքից տեղեկանում ենք, որ 15 տարվա գործունեության ընթացքում ներգրավված է եղել 26 դատական գործերով ու ակտերով, որոնց թվում է Արցախի պաշտպանության բանակի նախկին հրամանատար Սամվել Բաբայանի՝ քաղաքական աղմկահարույց «Իգլայի գործը», որով Բաբայանը 2017-ին դատապարտվեց վեց տարվա ազատազրկման: (Բաբայանն ազատ արձակվեց Վերաքննիչ դատարանի որոշմամբ՝ «Թավշյա հեղափոխությունից» հետո):
Արշալույս Մղդեսյան
