Արցախում նոր կորոնավիրուսի տարածումը կանխարգելող աշխատանքների շտաբ է գործում, որը ղեկավարում է Արցախի պետնախարար Գրիգորի Մարտիրոսյանը: Մարտի 16-ի տվյալներով նոր կորոնավիրուսով վարակման դեպք Արցախում չի արձանագրվել: Մամուլի ասուլիսի ժամանակ ասաց Գրիգորի Մարտիրոսյանը:
Վարակի տարածման կանխարգելման ուղղությամբ իրականացվում են մի շարք միջոցառումներ: Տեղեկանում ենք պետնախարարի ֆեյսբուքյան պաշտոնական էջից:
• կասեցվել է արտասահմանյան զբոսաշրջիկներին մուտքի արտոնագրի տրամադրման գործընթացը,
• ներքաղաքային տրանսպորտը ախտահարվում է օրական երկու անգամ,
• շահագրգիռ գերատեսչություններն էլ շարունակում են մշտական կապի մեջ մնալ ՀՀ-յան գործընկերների հետ:
• հանձնարարվել է սույն թվականի մարտի 16-ից մինչև ապրիլի 16-ը, ելնելով ծանրաբեռնվածության աստիճանից, սահմանափակել պետական կառավարման համակարգի և նրանց ենթակայության տակ գտնվող հաստատությունների աշխատակիցների մի մասի աշխատանքի ներկայանալը՝ դիտարկելով աշխատանքային պարտականությունները հեռահար եղանակով կազմակերպելու տարբերակը: Խոսքը վերաբերում է հատկապես նախադպրոցական, դպրոցական տարիքի և հատուկ խնամք պահանջող երեխա ունեցող, 60 և ավելի տարիքի, ինչպես նաև առողջական խնդիրներով՝ շաքարային դիաբետ, սրտանոթային, շնչառական հիվանդություններով աշխատակիցներին:
Պետնախարարը կոչ է արել
• դադարեցնել բազմամարդ հավաքները,
• սպորտային պարապմունքները և մշակութային միջոցառումները,
• անորոշ ժամանակով հետաձգել տոնական միջոցառումները, իսկ սգո արարողությունները կազմակերպել ոչ մարդաշատ:
Անդրադառնալով ՀՀ-ից և արտերկրից ընտրություններին մասնակցելու նպատակով Արցախ ժամանող դիտորդական խմբերին և զանգվածային լրատվամիջոցներին՝ պետական նախարարը հայտնեց՝ մուտքի արտոնագրի տրամադրման սահմանափակումը չի վերաբերելու նրանց, ովքեր ցանկություն են հայտնել լուսաբանելու ընտրական գործընթացը:
#CivilNet, #News
