Ուկրաինայի փոխարտգործնախարարը հորդորել է չգործածել «Հայոց ցեղասպանություն» ձևակերպումը

Ուկրաինայի արտաքին գործերի նախարարի տեղակալ Վասիլի Բոդնարը ուկրաինացի պաշտոնյաներին ուղղված իր նամակում վերջիններիս հորդորել է զերծ մնալ «Հայոց ցեղասպանություն» ձևակերպումը գործածելուց: Ինչպես հաղորդում է AnalitikaUA.net-ը, այդ մասին հաղորդել է Ուկրաինայի գերագույն Ռադայի պատգամավոր Դարյա Վոլոդինան՝ սոցցանցի իր էջում հրապարակելով պաշտոնյայի նամակի պատճենը:

Նամակում նշվում է, որ Ուկրաինան չի ճանաչում հայ ժողովրդի ցեղասպանությունը, դիվանագետը ուկրաինացի պաշտոնյաներին խնդրում է զերծ մնալ Հայոց ցեղասպանության 105-րդ տարելիցի կապակցությամբ ոգեկոչման միջոցառումներին մասնակցելուց և հրաժարվել «Ցեղասպանություն» եզրույթն օգտագործելուց:

Ուկրաինացի պատգամավորը նշել է, որ, որպես Հայաստանի հետ բարեկամության խմբի փոխնախագահ` չի կարող անտեսել այդ փաստը: Իր ֆեյսբուքյան գրառման մեջ պատգամավորը գրում է․ «Նմանատիպ «երջանկության նամակներ», իմ ունեցած տեղեկությունների համաձայն, արտգործնախարարությունը պետական կառույցներ ուղարկում էր դեռ Պորոշենկոյի ժամանակներից, և որքան հասկանում եմ, փոխնախարարը որոշել է շարունակել այդ ավանդույթը: Եվ բացարձակապես կարևոր չէ, որ այդ երկրում հեղափոխություն է տեղի ունեցել, որ այնտեղ (Հայաստանում) նոր բարեփոխումներ են իրականացվում և որ այս նամակի տարածումից առաջ Ռուսաստանի ղեկավարության հետ սկանդալ տեղի ունեցավ: Մենք համառորեն շարունակում ենք որպես Կրեմլի լրտես պիտակավորել արդեն այլ երկրների: Հիմա ես չեմ նշում, որ սա դիվանագետի պաշտոնական փաստաթուղթ է: Դիվանագետի: Չնայած, իմ լեզուն այլևս չի պտտվում նման նամակ գրած մարդուն դիվանագետ կոչել: Վստահ եմ, որ բոլորն, ովքեր հասկանում են այս հայտարարության անհեթեթությունը, կհամաձայնեն ինձ հետ և իրենց կարծիքը կհայտնեն փոխնախարարին այս ամենի վերաբերյալ»:

Պատգամավորը գրառման մեջ հիշեցրել է, որ Հայոց ցեղասպանությունը ճանաչել են այնպիսի երկրներ, ինչպիսիք են ԱՄՆ-ը, Ֆրանսիան, Կանադան, Գերմանիան, Իտալիան, Նիդերլանդները, Չեխիան, Շվեդիան, Շվեյցարիան, Հունաստանը, Պորտուգալիան և այլք:

Դարյա Վոլոդինան կարծում է, որ Ուկրաինայի արտգործնախարարությունը պետք է զերծ մնա նման նամակներից:

Ըստ Վոլոդինայի՝ Հայաստանի հետ միջխորհրդարանական հարաբերությունների հարցերով խորհրդարանական խմբի անդամները մտադիր են պահանջել հետ կանչել այդ նամակը, և հնարավոր է՝ ծառայողական քննություն սկսվի պատասխանատու այն պաշտոնյայի նկատմամբ, որը հեղինակել և տարածել է այդ նամակը:

Հայոց ցեղասպանության 105-րդ տարելիցի կապակցությամբ միջոցառումներն Ուկրաինայում կարանտինով պայմանավորված՝ ոչ թե չեղարկվում են, այլ փոխվում է դրանց անցկացման ձևաչափը։ Ինչպես հայտնել է Ուկրաինայի Հայերի միության գործադիր տնօրեն Հովակիմ Հարությունյանը, միջոցառումները տեղափոխվում են առցանց տիրույթ։ Նաև՝ բազմաթիվ քաղաքներում, որտեղ ներկայացված է հայկական համայնքը, տեղադրվել են Հայոց ցեղասպպանության մասին իրազեկող ցուցանակներ և վահանակներ։

Ինչպես ՍիվիլՆեթի հետ զրույցում նշեց ուկրաինաբնակ հրապարակախոս Մարատ Հակոբյանը, միջոցառումները կենտրոնանում են գիտական և տեսաձայնային տիրույթում՝ սոցիալական հոլովակների, ցուցահանդեսների ու դասախոսությունների ձևաչափով։

Ստելլա Մեհրաբեկյան