Ռոբերտ Քոչարյանի փաստաբանական թիմը ստացել է Երևանի ընդհանուր իրավասության դատարանի որոշումը Քոչարյանի խափանման միջոց կալանքը փոխելու միջնորդությունները մերժելու վերաբերյալ։ Որոշումը բաղկացած է 92 էջից։ Պաշտպանական կողմը համաձայն չէ որոշման հիմքերի հետ և ներկայում վերաքննիչ բողոքներ է պատրաստում։
Ավելի վաղ Քոչարյանի փաստաբանական թիմը ներկայացրել էր երկրորդ նախագահի խափանման միջոց կալանքը անձնական երաշխավորությամբ փոխելու միջնորդություն։ Անձնական երաշխավորությամբ հանդես էին եկել ՀՀ նախկին վարչապետներ Վազգեն Մանուկյանը, Խոսրով Հարությունյանը, Կարեն Կարապետյանը, Արցախի Հանրապետության նախկին վարչապետ Անուշավան Դանիելյանը։
Մայիսի 13-ին Երևանի ընդհանուր իրավասության դատարանի (Շենգավիթի նստավայր) դատավոր Աննա Դանիբեկյանը հրապարակեց դատական ակտը, որի համաձայն՝ միջնորդություն մերժվեց, և Քոչարյանը շարունակում է մնալ կալանքի տակ։
Դատական նիստը հետաձգվեց, հաջորդ դատական նիստը նշանակվեց մայիսի 19-ին՝ ժամը 13։00-ին։
Ժաննա Ավագյան
