Երևանի քաղաքապետարանը, թեև 2010-2011 թթ. ասֆալտապատման աշխատանքներին ուղղել է տարեկան ավելի քան 4,5 մլրդ, շարունակում է պնդել, որ մայրաքաղաքի փողոցների ասֆալտբետոնյա ծածկի լայնամասշտաբ վերանորոգման աշխատանքներ վերջին տարիներին չեն իրականացվել։ Արդյունքում այս տարի ասֆալտապատմանը հատկացվել է մոտ 9 մլրդ, որից 4,5 մլրդ-ը՝ կառավարության պահուստային ֆոնդից։ Համաշխարհային բանկի ուսումնասիրություններով՝ զարգացող երկրներում ճանապարհաշինական հայտամրցույթներում գումարի 5-20%-ը պաշտոնյաներին տրվող կաշառքներն են։
Երևանի քաղաքապետարանը այս տարի ընդհանուր առմամբ մոտ 9 մլրդ է ծախսել մայրաքաղաքի փողոցների ասֆալտբետոնյա ծածկի վերանորոգման, եզրաքարերի փոփոխման համար։ Քաղաքապետարանի բյուջեով այս տարի ասֆալտբետոնյա ծածկի վերանորոգման համար նախատեսված է եղել մոտ 4,3 մլրդ, սակայն այդ գումարը քաղաքապետարանին չի բավարարել։ Արդյունքում երեկ կառավարությունը որոշում է ընդունել պահուստային ֆոնդից հատկացնել ևս 4,5 մլրդ։
Կառավարության այս որոշումն ուշագրավ է այնքանով, որքանով այն post factum է։
Տարածքային կառավարման նախարարության միջոցով Երևանի քաղաքապետարանին «դրամաշնորհներ համայնքներին հոդվածով» գումար հատկացնելու որոշման տեղեկանքից երևում է, որ քաղաքապետարանը պատվիրել է 4,6 մլրդ-ի աշխատանքներ. դրանք անգամ հիմնականում կատարված են։ Պարզ ասած՝ քաղաքապետարանը պատվիրել է ասֆալտբետոնյա աշխատանքներ, կատարվել է եզրաքարերի վերանորոգում, և հիմա կառավարությունը ստիպված է պետբյուջեից ֆինանսավորել դրանք։ Անհասկանալի է՝ եթե քաղաքապետարանը կնքել է 4,6 մլրդ-ի պայմանագրեր, ինչո՞ւ է կառավարությունից խնդրել հատկացնել 4,5 մլրդ։
Ըստ տեղեկանքի՝ քաղաքապետարանը համապատասխան աշխատանքների ձեռքբերման համար սահմանված կարգով հայտարարել է մրցույթներ, կնքել է ընդհանուր առմամբ շուրջ 4,6 մլրդ-ի պայմանագրեր։
Համաձայն պայմանագրային արժեքների՝ 1 քմ ասֆալտբետոնյա ծածկի հիմնանորոգման արժեքը կազմել է 6,5 հազ., այն դեպքում, երբ քաղաքապետարանը դրանք գնահատել է 14,48 հազ., 1 քմ ասֆալտի վերանորոգումը մայթերի հատվածներում կազմակերպությունները կատարել են 4,5 հազ-ով (ծրագրվել է մոտ 8 հազ.), 1 գծամետր եզրաքարի վերանորոգման արժեքը կազմել է 14 հազ. (ծրագրվել է 23,7 հազ.)։
Ստացվում է, որ քաղաքապետարանը աշխատանքները ձեռք է բերել մոտ երկու անգամ էժան գներով։ Այս պայմաններում կա՛մ քաղաքապետարանի նախահաշվային փաստաթղթերն են ուռճացված, կա՛մ ընկերությունները խնայել են որակի հաշվին։
Երթևեկելի մասի շուրջ 650 հազ. քմ և մայթերի հատվածում 37,5 հազ. քմ ասֆալտբետոնյա շերտի վերանորոգման, ինչպես նաև շուրջ 15 հազ. գծամետր նոր եզրաքարերի տեղադրումը քաղաքապետարանը հիմնավորել է նրանով, որ Երևանի պողոտաների և փողոցների ասֆալտբետոնյա ծածկի լայնամասշտաբ վերանորոգման աշխատանքներ վերջին տարիներին չեն իրականացվել, որի արդյունքում ու նախորդ տարվա տեղումների ծավալների զգալի ավելացման պատճառով կենտրոնական փողոցների և պողոտաների, ինչպես նաև մայթերի հատվածներում ասֆալտբետոնյա ծածկը ամբողջովին քայքայվել է։
Հիմնավորումը ուշագրավ է, եթե հաշվի առնենք, որ 2011թ. Երևանի բյուջեով ասֆալտբետոնե աշխատանքների համար ծախսվել է մոտ 5 մլրդ, ևս 4,5 մլրդ ասֆալտապատմանն ուղղվել է 2010թ.։
Համաշխարհային բանկի ուսումնասիրություններով՝ զարգացող երկրներում ճանապարհաշինական հայտամրցույթներում գումարի 5-20%-ը պաշտոնյաներին տրվող կաշառքներն են։ Հայաստանի մասով թեև հստակ ուսումնասիրություններ չկան, բայց Երևանի քաղաքապետարանի հայտարարած մրցույթների բովանդակությունն ու հաղթող ընկերությունների հետ պայմանագրեր կնքելու որոշումներն արդեն իսկ հուշում են կոռուպցիոն ռիսկերի մասին։