Դեռ երբեք չէր եղել այսպես, որ ընտրողն այսպես սերտ կապի մեջ լինի ընտրակաշառք բաժանող ընտրվողի հետ. «Կենտրոն» հեռուստատեսության «Ուրվագիծ» հաղորդման շրջանակում նշեց «ՀՅԴ» խմբակցության անդամ Արմեն Ռուստամյանը:
Նա նշեց, որ չի մեղադրում ընտրակաշառք վերցնողին, սակայն այս իրավիճակում իրենց՝ որպես քաղաքական ուժի, ընտրապայքարին մասնակցելն անհեռանկարային է: «Այս պայքարի արդյունքում մեկն է հաղթելու, և եթե դա դու չես, քո ավելացրած տոկոսները ոչ մեկի չի հետաքրքրում. ժողովրդին հետաքրքրում է իր կյանքի փոփոխությունը, որին կարելի էր հասնել ընդդիմության միավորմամբ, սակայն դա հնարավոր չեղավ»,- ասաց նա՝ հավելելով, որ այս ընտրությունների արդյունքները կանխորոշված են, և դա քաղաքական պայքարի հետ որևէ կապ չունի: «Ժողովուրդն այսօր իշխանափոխություն է ուզում, ոչ թե՝ ընտրությունների իմիտացիա»,- նշեց նա:
Այսօր, ըստ նրա, պետությունն ու իշխող կուսակցությունը նույնացված են, և քաղաքական ուժերի համար միայնակ անհնար է մրցել պետական ռեսուրսներով ընտրապայքարի դուրս եկող քաղաքական ուժի հետ: «Դու կարո՞ղ ես մեղադրել շախմատիստին, թե ինչի չի գնում շախմատի մրցումներին, երբ նա գիտի, որ ինքը մի քայլ է անելու, դիմացինը՝ երեք, կամ ասենք՝ վազորդին, երբ ինքը դուրս պիտի գա վազքուղի, իսկ մեկ ուրիշը մատացիկլետով է գալու, կամ նարդի խաղացողին, որը զառ է գցում ու խաղում՝ ինչ գալիս է, իսկ դիմացինն առանց զառը գցելու խաղում է՝ ինչ ուզում է: Նժդեհը, եթե այսօր իր թեկնածությունը դներ Սյունիքում, անպայման կպարտվեր»,- նշեց նա՝ հավելելով, որ քաղաքական ուժերի դեպքում էլ պայմանները պիտի հավասար լինեն. անարդար պայքարի դեպքում հաղթում է անարդար ուժեղը: