ՀՀ Ազգային ժողովում այսօր հարցուպատասխանի ընթացքում «ՀՅԴ» խմբակցությունից Աղվան Վարդանյանը բարձրացրեց Սյունիքի մարզի արոտավայրերը Իրանին վարձակալության տալու լուրերին, նշեց, որ նման պայմանագրի քաղաքական, տնտեսական, բնապահպանական և սոցիալական նշանակությունը նույնիսկ ուսումնասիրված չէ:
«Երեկ տարածքային կառավարման նախարարությունը պարզաբանել է, որ առայժմ որևէ նման իրավական գործընթաց գոյություն չունի, սակայն հարցերը մնում են,- ասաց նա՝ մանրամասնելով,- կան Սյունիքի մարզի պաշտոնյաների ստորագրությունները այս փաստաթղթերի՝ ավելի ճիշտ, կիսագրագետ թղթերի տակ: Երկրորդ, ՏԿՆ-ի պարզաբանումից հետո Aravot.am կայքում հայտնվել է Սունիքի մարզի վարչության պետի հարցազրույցը, որտեղ այդ մարդը գովերգում է իրենց նախա-նախա-նախա-նախաձեռնությունը: Երրորդ, ՏԿՆ-ի պարզաբանման մեջ հղում կա կառավարության երկու որոշումներին, որոնք էական կապ չունեն խնդրո առարկայի հետ՝ մեկը վերաբերում է արոտավայրերի օգտագործման կարգին, պետական սեփականության արոտավայրերից օգտվելու պայմանագրերի ձևին: Չորրորդ, հողային օրենսգիրքը նախատեսում է նման պայմանագրերը կնքել մրցույթով, սակայն մրցույթի կարգ կառավարությունը դեռ չի սահմանել: Եվ հինգերորդ՝ հիմնական հարցը. ի՞նչ է տալու հնարավոր այդ գործարքը Հայաստանի Հանրապետության և տարածաշրջանի գյուղացիությանը, ինչո՞ւ հնարավոր չէր պետականորեն երաշխավորել մսամթերքի ու կաթնամթերքի իրացում, և անասնապահության զարգացմանը մասնակից դարձնել մեր գյուղացիներին ու տնտեսվարողներին: Կառավարությունը գիտակցո՞ւմ է պետական և համայնքային հողերը օտարերկրյա ֆիզիկական կամ իրավաբանական անձանց վարձակալության տալու տնտեսական, քաղաքական, հոգեբանական, բնապահպանական հետևանքները»:
Հարցերին ի պատասխան՝ ՀՀ արդարադատության նախարար Հրայր Թովմասյանը նշեց, որ տարածաշրջանում տասնյակ միլիոնների ներդրումներ են անհրաժեշտ անասնապահության ոլորտում, և այս պատճառով վարձակալությունը կարող է շահավետ լինել: «Սակայն եթե նման հարց քննարկվի, դա չի կարող լինել մարզպետարանի մի աշխատակցի արևմտահայերենով թարգմանված մի փաստաթղթի տակ դրված ստորագրության հիման վրա: Մեր օրենսդրությունն այս առումով բավականին խիստ է, հրապարակայնության բավականին մեծ դաշտ է սահմանում, և այս ընթացակարգով կանցնի»,- ասաց նա՝ չցանկանալով անդրադառնալ «չեղած բանի» քաղաքական, բնապահպանական և այլ տեսանկյուններին: