Լուսանկարը՝ ՍիվիլՆեթի արխիվից:
ԳԱԼԱ հեռուստաընկերությունը հայտարարություն է տարածել, որը նաև եթեր է հեռարձակվում՝ կես ժամը մեկ պարբերականությամբ: Հայտարարության մեջ մասնավորապես ասված է. «ԳԱԼԱ Հ/Ը ճշգրիտ տեղեկություններ ունի, որ Գյումրի քաղաքի տարբեր հատվածներում մեկնարկել է ընտրակաշառք բաժանելու արատավոր պրակտիկան` մարդկային խղճի համատարած առուծախը:
Կոչ ենք անում քաղաքացիներին՝ չգնա´լ այդ ստոր քայլին և չվաճառել սեփական ձայնը: Գիտակցե´ք, որ մինչ դուք զբաղված եք քստմնելի առուծախով, ձեր իսկ երկիրը դատարկվում է, խորտակվում է ձեր երեխաների ապագան: Մերժե´ք ցանկացած անպարկեշտ առաջարկ: Ձեր լուռ համաձայնությունը ստոր գործարքի կնիք կդառնա, և ամբողջ 5 տարի դուք կօգտագործվեք որպես գործիք` աննյութ, անշունչ և անդեմ:
Հորդորում ենք` հեռու մնալ կործանարար գործարքից, մի´ վաճառեք ձեզ և ձեր ապագան` գիտակցելով, որ այդ դեպքում դուք պարզապես ձեր իրավունքները պաշտպանելու իրավունք չեք ունենա:
Հիշեցնենք` անկաշառ մարդն է միայն պահանջատեր:
Ուստի հորդորում ենք նրանց, ովքեր վերցրել են ընտրակաշառք՝ հե´տ վերադարձրեք ոչինչ չարժեցող այդ գումարը և վերականգնեք ձեր պատիվն ու արժանապատվությունը, փորձեք սրբագրել ձեր արարքը, դարձեք հասարակության առողջ մասնիկ:
Իսկ նրանք, ովքեր արդեն հասցրել են ծախսել այդ գումարը, երաշխավորելով գաղտնիությունը, հրավիրում ենք ԳԱԼԱ Հ/Ը: Պատրաստակամ ենք տալ ծախսված գումարը, պայմանով, որ այն կվերադարձնեք «կավատներին»»:
