Գերմանական արտադրության Volkswagen Golf-ը դարձել է «Տարվա ավտոմեքենա» եվրոպական հեղինակավոր մրցույթի հաղթող: Հարցմանը, որի արդյունքներով Volkswagen Golf-ը զբաղեցրել է առաջին տեղը, մասնակցել է 58 պրոֆեսիոնալ լրագրող Եվրոպայի 22 երկրից:
Արդյունքների ամփոփումը տեղի է ունեցել «Պալէքսպո» ցուցասրահում մարտի 4-ին՝ 83-րդ Ժնևյան ավտոսրահի՝ լրագրողների համար բացման նախօրեին: Ցանկի երկրորդ տեղում Subaru BRZ/ToyotaGT86/-ն է, երրորդում՝ Volvo V40-ը:
Վերոնշյալ ավտոմեքենաներից բացի՝ հեղինակավոր մրցույթի եզրափակչում են նաև Ford B-Max, Hyundai i30, Mercedes Classe A, Peugeot 208, Renault Clio ավտոմեքենաները:
2012թ. այս մրցանակին կրկին արժանացել էր գերմանական արտադրության ավտոմեքենա՝ Opel Ampera էլեկտրական մեքենան:
Հանրության համար ավտոսրահը բաց կլինի մարտի 7-17-ը:
«Տարվա ավտոմեքենա» մրցույթը Եվրոպայում անցկացվում է 1964-ից:
