Մենք մասնակցում ենք Երևանի ավագանու ընտրություններին մի համոզումով՝ կառավարման համակարգը փոխելու համար. Ազատության հրապարակում շարունակվող հանրահավաքում նշեց «Բարև Երևան» դաշինքի ցուցակը գլխավորող Արմեն Մարտիրոսյանը:
«Երևան քաղաքը ռեսուրսների առումով շատ մեծ նշանակություն ունի. կառավարումը, եկամուտների բաշխումը, բիզնես անելն այստեղ բացառապես քաղաքական որոշման արդյունք են: Կարևորն այստեղ ավագանին է, որն ընտրելու եք: Երևանի քաղաքապետը, Երևան քաղաքի ավագանու, «Բարև Երևան» դաշինքի որևէ անդամ չի ունենալու բիզնես: Ինչպես այս ամբողջ ընթացքում «Ժառանգության» անդամներն են սպասարկել, սպասարկելու են քաղաքացու շահը՝ ուրիշ ոչ մի շահ չեն սպասարկելու: Եվ դա է, որ թույլ չի տալու, Երևանի քաղաքապետը 500 անգամ հարստանա: Որևէ դեպքում Երևանի փոքրիկ մի դալանը նկարազարդելու համար 3000 դոլար չի ծախսվելու, երբ Գեղարվեստի ակադեմիայի սաները, վստահ եմ, դա ձրիաբար կանեն: Որևէ դեպքում գումար չի տրամադրվելու, որ վալաչկովա բերեն, քանի որ Հայաստանում ունենք Արթուր Իսպիրյանի նման իրական արվեստագետներ, բարձրակարգ դերասաններ»,- ասաց նա:
Մարտիրոսյանը նշեց նաև, որ նման սկզբունքով աշխատելու դեպքում կարճ ժամանակում մեծ գումարներ կկուտակվեն, և դրանք հնարավոր կլինի ուղղել Մետրոպոլիտենի նոր կայարան կառուցելուն, փողոցները բարձրակարգ ասֆալտով նորոգելուն, ներկրվելու են նորմալ ավտոբուսներ՝ «ոչ թե այս ավտոբուսների նման, որոնցով պիտի կռացած, գլուխդ թեքած» երթևեկես: «Անօրինական որոշումներ կայացրածները կանգնելու են դատարանի առաջ ու պատժվելու են: Ես ցանկանում եմ, որ մեր մայրաքաղաքը, ինչպես փետրվարի 18-ին մեր հայրաքաղաքը՝ Գյումրին հաղթեց, հաղթի, ու «Բարև Երևան» դաշինքին ձայն տա: Իմ խնդրանքն ու հորդորն է. դուք ունեք իրական փոփոխության հնարավորություն: Մենք ձեր հորդորը լսել ենք, և մայիսի 5-ին ունենալու ենք վստահելի վստահված անձինք. Ձեր տված ձայնը պահպանվելու է. ուստի գնանք տեղամաս ու ասենք՝ բարև, Երևան»,- ամփոփեց նա: