Մարդիկ փողոց են դուրս գալիս, երբ կա երևույթների խրոնիկ կրկնություն. նշեց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը «Կենտրոն» հեռուստատեսության «Ուրվագիծ» հաղորդման շրջանակում: «Բանակում կատարված հանցագործությունների, սպանությունների ծառայողական պատշաճ քննություն չի իրականացվում»,- նշեց նա՝ հավելելով, որ ինքը հետազոտել է ծառայողական քննությունները, և վստահ է, որ դրանք չեն հանգեցնում պատշաճ պատասխանատվության, ինչն էլ չի նվազեցնում դրանց կրկնման հավանականությունը: «Ասենք, սպանություն է տեղի ունեցել, մեկին տեղափոխում են մի զորամասից մյուսը, կամ պաշտոնից հեռացնում, բայց քրեական պատասխանատվություն չեն կրում զորամասի հրամանատարը, վաշտի հրամանատարը, մարդիկ, ովքեր անմիջականորեն պիտի պատասխանատու լինեն, պատասխանատու են»,- նշեց նա:
Սպանված զինվոր Լյուքս Ստեփանյանի հարազատների ողբերգական ըմբոստությանն ու դին Երևան տեղափոխելու փորձին անդրադառնալով ՝ Սաքունցն այն որակեց «բունտ»: «Իսկ քաղաքացիների դեմ կառավարությունը հանել էր զինվորական ոստիկանների, զինծառայողների և նաև՝ սովորական ոստիկանների. ո՞վ էր հրաման տվել քաղաքացիների դեմ դուրս գալ նրանց, հարց է ծագում»,- նշեց նա: Սաքունցի հավաստմամբ՝ հարցն այն չէ, թե ճիշտ էր այդ բռնկումը, կամ ինչ հետևանքներ կունենար այն, այլ կարևոր է այն, որ հարկ էր նախորդ օրը այցելել սպանված զինծառայողի հարազատներին ու ցավակցել նրանց, ոչ թե առերեսվել նման իրավիճակի, նոր միայն գնալ ընդառաջ:
Անդրադառնալով պաշտպանության նախարարի այն հայտարարությանը, թե Լյուքս Ստեփանյանի սպանության գործի հետաքննությունը վերցնելու է իր անմիջական հսկողության տակ՝ Սաքունցն ասաց. «Առաջին անգամ չէ, որ նման հայտարարություններ են լինում, բայց դրանից հետո էլ շարունակվում են ոչ կանոնադրական հարաբերությունները, բռնությունները»:
Իրավապաշտպանն ասաց, որ զինված ուժերում չեն վերացվում խնդիրների պատճառները: «Հեռացվում է հրամանատարը կոռուպցիայի համար, բայց բանակին հետո էլի գոմեշի միս է մատակարարվում, կամ խոզի մսի մատակարարման տենդերը շահել է ընկերություն, որը սերտորեն կապ ունի զինվորական դատախազ Գևորգ Կոստանյանի հետ: Ու խնդիրն այն է, որ այդ տենդերները գաղտնի են պահվում, հրապարակային չեն, ինձ դա ներսից՝ բանակից են հայտնել»,- նշեց նա: Սաքունցը հավելեց, որ տեղեկատվությունը տրամադրող սպաները, բնականաբար, չեն ասում իրենց անունները, քանի որ վստահ չեն, որ իրենց նկատմամբ հետապնդումներ չեն իրականացվի, սակայն նշված փաստերը որպես կանոն հետագայում հաստատվում են:
Զինուժում իրավապաշտպանը իրավունքների պաշտպանության դրական փոփոխություն չի նկատում: «Երբ Ծովագյուղում զոհված զինվորի գործը մտել է քննության, քննիչը ծնողներին ասել է՝ ես եմ ձեր պաշտպանը: Հիմա գործին նայում ենք՝ երեք կրակոցով ինքնասպանություն են ձևակերպել: Երեք կրակոցով: Էն էլ գնդացրի կրակոցներ: Ի՞նչ են արել. ծնողներին թյուրիմացության մեջ են գցել ու գործը ձևակերպել ինքնասպանություն: Այ, էսպիսի բաներ կան, որ ես ասում եմ՝ ոչ, չկա դրականը»,- նշեց նա:
Ըստ Արթուր Սաքունցի՝ ոչ թե իր և այլ իրավապաշտպանների քննադատությունն է խարխլում պատերազմական վիճակում գտնվող մեր բանակի հիմքերը, այլ՝ իր քննադատությանն արժանացած անարդարության դեպքերի թողտվությունը, անպատժելիությունը՝ բարձրաստիճան որոշ պաշտոնյաների նկատմամբ, չնահանջող կոռուպցիան:
