Հուլիսի 17-ին Թուրքիային սահմանակից սիրիական Ռաս ուլ Այն քաղաքում քրդերի և Սիրիայի նախագահ Բաշար ալ Ասադի դեմ կռվող «Էլ Նուսրա» ծայրահեղական կազմակերպության միջև տեղի ունեցած մարտերին մասնակցել են նաև թուրքեր, հաղորդում է Hurriyet-ը:
Այն բանից հետո, երբ քրդերը հաղթել են «Էլ Նուսրայի» խմբավորումներին և գրավել Ռաս ուլ Այնի նրանց հենակետերը, հայտնաբերվել են թուրքական ինքնությունը հաստատող երեք փաստաթուղթ:
Ուշագրավ է, որ Hurriyet-ի հաղորդմամբ` երեք սպանված թուրքերից մեկը` Մուրադ Քոչաքը, Թուրքիայում ձերբակալվել է «Ալ Կաիդայի» գործի շրջանակում, իսկ այնուհետև ազատ է արձակվել: Իսկ թե ինչ գործ ունեին մյուս թուրքերը Սիրիայում, չեն կարողացել պատասխանել նաև նրանց հարազատները:
Քրդերը պնդում են, որ Թուրքիան հովանավորում է «Ալ Կաիդայի» հետ սերտ կապեր ունեցող «Էլ Նուսրա» ծայրահեղական կազմակերպությանը:
Հուլիսի 16-ից Ռաս ուլ Այնում քրդերի և «Էլ Նուսրայի» միջև ընթացող մարտերի ընթացքում կրակոցներ են հնչել Թուրքիայի ուղղությամբ, որոնց վերջինս պատասխանել է:
Ներկայում Ռաս ուլ Այնը քրդերի վերահսկողության տակ է, ինչն անհանգստացնում է Թուրքիային:
