Թուրքիայում մեծ արձագանք են գտել երկրի ազգային փոքրամասնություններին կոդավորելու քաղաքականության մասին տարածված լուրերը. թեմային անդրադարձել են ինչպես թուրքական առաջատար լրատվամիջոցները, այնպես էլ քրդական թերթերը:
Կ.Պոլսում լույս տեսնող «Ակօսը» գրել էր, թե 1923թ. ի վեր Լոզանի պայմանագրով ճանաչված Թուրքիայի ազգային փոքրամասնությունների ներկայացուցիչների նկատմամբ գաղտնի կոդ է կիրառվել: Այսպես` համար 1-ը հույների կոդն է, 2-ը` հայերինը, 3-ը` հրեաներինը: Այս կոդերը գրանցված են եղել բնակչության ինքնության վկայականներում և գաղտնի են պահվում:
Թեմայի վերաբերյալ Taraf-ը զրուցել է փաստաբան Քեզբան Հաթեմիի հետ, որը նշել է, որ դա քաղաքացիների կոդավորում է և չի համապատասխանում Թուրքիայի ստանձնած միջազգային պարտավորություններին:
Haberturk-ն էլ հերքում է, թե կոդի գոյությունը նշանակում է քաղաքացիների կոդավորում: Haberturk-ի հետ զրույցում հայ համայնքի ներկայացուցիչ Պետրոս Շիրինօղլուն հայտարարել է, թե չի հավատում նման տարանջատմանը:
Քրդական Ozgur-gundem կայքն էլ թեմայի վերաբերյալ իր հոդվածը վերնագրել է «Ցեղասպանությունից մինչև գաղտնի կոդ» վերնագրով:
«Ակօսի» հրապարակմանն անդրադարձել է նաև Թուրքիայի ներքին գործերի նախարարությունը և ինչպես գրում է թերթը, փաստորեն ճանաչել է «ցեղային գաղտնագրի» գոյությունը: Թուրքիայի ՆԳՆ-ի տարածած հայտարարության համաձայն` օգտվելով ազգության և ցեղային պատկանելության վերաբերյալ օսմանյան ժամանակաշրջանի գրանցամատյաններում եղած տվյալներիից` Թուրքիայի ազգային փոքրամասնությունների ցեղային պատկանելության մասին տեղեկություն է տրամադրվել ազգային կրթության նախարարությանը: Թեև պետք է նշել, որ ՆԳՆ-ի հայտարարության մեջ փորձ է արվում ցույց տալ, թե դա փոքրամասնությունների նկատմամբ կիրառված խտրական քաղաքականություն չէ:
Թուրքիայի ընդդիմադիր Ժողովրդահանրապետական կուսակցության պատգամավոր Սեզգին Թանրըքուլուն հարցում է ներկայացրել երկրի վարչապետ Ռեջեփ Թայիփ Էրդողանին` պահանջելով բացատրություն տալ գաղտնի կոդի կապակցությամբ: Նա հարցրել է, թե արդյոք գաղտնի կոդը միայն կրթության նախարարությունում է օգտագործվում, թե ոստիկանությունում, հետախուզությունում, դատախազության գործերում և այլուր ևս:
Ներկայում Թուրքիայում քննում են, թե արդյոք ասորիների կամ Թուրքիայի ոչ թուրք մուսուլման բնակչության նկատմամբ կիրառվել է նման տարանջատիչ կոդավորում, թե ոչ: