13 օգոստոս, 2013 09:51

Օգոստոսի 13-ը Ձախլիկների միջազգային օրն է

Ամեն տարի՝ օգոստոսի 13-ին, նշվում է Ձախլիկների միջազգային օրը: Տոնն առաջին անգամ նշվել է 1992թ. օգոստոսի 13-ին՝ Ձախլիկների բրիտանական ակումբի նախաձեռնությամբ, որը ստեղծվել էր 1990-ին:

Ժամանակակից աշխարհը ստեղծված է մարդկանց համար, որոնք ամեն ինչ անում են աջ ձեռքով: Կենցաղային բազմաթիվ իրեր, որոնց շարքում՝ դռներն ու կողպեքները, համակարգչային մկնիկներն ու խոհանոցային պարագաները, պատրաստված են աջլիկների համար: Ամեն տարի այս օրը ամբողջ աշխարհի ձախլիկները ձգտում են հրավիրել արտադրողների ուշադրությունն այն բանին, որ ապրանքներ ստեղծելիս նրանք հաշվի առնեն նաև իրենց շահերն ու հարմարավետությունը:

Ձախլիկների բրիտանական ակումբի գլխավոր մտահոգությունն այսօր այն է, որ երկրի բազմաթիվ դպրոցներում ձախլիկ երեխաներին շարունակում են սովորեցնել գրել աջ ձեռքով, ինչը հանգեցնում է հոգեբանական սթրեսի և նվազեցնում աշակերտների առաջադիմությունը:

Հոգեբանները կարծում են, որ ձախլիկներն օժտված են ուժեղ կամքով և ստեղծագործական հզոր ներուժով: Ըստ վիճակագրական տվյալների՝ աշխարհի բնակչության 10%-ը ձախլիկ է:

Հայտնի մարդկանց ցանկը, որոնք ամեն ինչ անում էին ձախ ձեռքով, տպավորիչ է՝ Մարկ Տվեն, Լեոնարդո դա Վինչի, Միքելանջելո, Բեթհովեն, Ռախմանինով, Փոլ Մակքարթնի և Ռինգո Սթար, Մերլին Մոնրո, Ռոբերտ դե Նիրո: Ձախլիկ էին նաև Հուլիոս Կեսարն ու Ալեքսանդր Մակեդոնացին, Նապոլեոն Բոնապարտը, Ուինսթոն Չերչիլը, Ժաննա դ՚Արկը, նույնիսկ ԱՄՆ երեք նախագահները՝ Ռոնալդ Ռեյգանը, Ջորջ Բուշ ավագն ու Բիլ Քլինթոնը: