Ֆրանսիայի իշխանությունները Սիրիայում ռազմական միջամտության վերաբերյալ որոշում կարող են ընդունել առաջիկա օրերին, օգոստոսի 26-ին հայտարարել է Ֆրանսիայի արտգործնախարար Լորան Ֆաբիուսը:
«Որոշումը կընդունվի առաջիկա օրերին, – Ֆաբիուսի խոսքերը մեջբերում է Reuters գործակալությունը: – Բոլոր տարբերակները դիտարկվում են: Չի քննարկվում միայն մեկը՝ ոչինչ չանելը», – ասել է Ֆաբիուսը:
Սիրիայում իրավիճակի հերթական սրումը տեղի է ունեցել օգոստոսի 21-ին, երբ մի շարք լրատվամիջոցներ հաղորդեցին սիրիական զորքերի կողմից Դամասկոսի արվարձաններում քիմիական զենքի մասշտաբային կիրառման մասին:
Օգոստոսի 25-ին հայտնի է դարձել, որ Սիրիայի կառավարությունը համաձայնեցրել է ՄԱԿ-ի տեսուչների այցելությունների ժամանակացույցն այն վայրեր, որտեղ ենթադրաբար քիմիական զենք է կիրառվել:
Reuters գործակալության հաղորդմամբ՝ այսօր՝ օգոստոսի 26-ին, ՄԱԿ-ի տեսուչները ժամանել են Դամասկոս և ուղևորվել դեպի Արևելյան Ղուտայի շրջան, որտեղ, ընդդիմության հաղորդագրությունների համաձայն, քիմիական զենք է կիրառվել:
