Նվազագույնը 14 մարդ զոհվել է Ճապոնիայում և 50 մարդ անհայտ կորել է «Վիֆա» թայֆունի առաջացրած ողողումների և սողանքների հետևանքով։
Ինչպես հաղորդում է BBC-ն, ամենից շատ մարդ զոհվել է Իձու Օսիմա կղզում՝ Տոկիոյից 120 կմ հարավ, որտեղ տասնյակ տներ թաղվել են սողանքների տակ կամ մնացել են ջրի տակ։
Իձու Օսիմա կղզուն հարվածել է ուժեղ քամի, որն իր հետ բերել է հորդառատ անձրևներ։ Հոկտեմբերի 16-ի առավոտյան մեկ ժամվա ընթացքում տեղումների ծավալը հասել է 122 մմ-ի։
Կղզում ավերվել կամ վնասվել է ավելի քան 200 շինություն, գլխավոր քաղաքի շատ փողոցներ ծածկվել են ցեխի հոծ զանգվածով։ Իձու Օսիմայում ապրում է մոտ 8 հազ․ մարդ։
Թայֆունի էպիկենտրոնում քամու ուժգնությունը կազմում է վայրկյանում 35 մ։
Փրկարարները փնտրում են անհայտ կորածներին։
Տոկիոյում չեղյալ են հայտարարվել 400 ավիա և արագընթաց գնացքների չվերթներ, ինչպես նաև փակվել են բոլոր դպրոցները։
Սա Տոկիոյի շրջան հասած ամենաուժեղ փոթորիկն է վերջին տասը տարիներին։
Ճապոնիայի ազգային օդերևութաբանական վարչությունը մարդկանց կոչ է անում տներից դուրս չգալ։
Թայֆունն այժմ շարժվում է «Ֆուկուսիմա» ատոմակայանի ուղղությամբ։
Ակնկալվում է, որ մինչև հոկտեմբերի 17-ի գիշեր թայֆունը կմոտենա Կուրիլյան կղզիներին։ Այդ ժամանակ թայֆունի քամու ուժգնությունը կթուլանա, և այն կվերածվի արևադարձային փոթորկի։
