Ղրիմի Գերագույն ռադայի պատգամավորները ընդունել են որոշում «Ղրիմի անկախության մասին»։ Այս մասին ասված է Ղրիմի խորհրդարանի կայքում տեղադրված հաղորդագրությունում։
«Ղրիմի Ինքնավար Հանրապետության Գերագույն ռադայի՝ 2014թ․ մարտի 17-ի արտահերթ լիագումար նիստին ընդունվել է որոշում «Ղրիմի անկախության մասին»։ Կողմ է քվեարկել 85 պատգամավոր»,- նշված է հաղորդագրությունում։
Համաձայն որոշման՝ Ղրիմը հռչակվում է անկախ և սուվերեն պետություն՝ Ղրիմի Հանրապետություն, որում Սևաստոպոլ քաղաքն ունի հատուկ կարգավիճակ։
Խորհրդարանը նաև հանդես է եկել Ղրիմը որպես սուբյեկտ Ռուսաստանի Դաշնության կազմում ընգրկելու առաջարկով։
«Ղրիմի Հանրապետությունը՝ ի դեմս Ղրիմի Ինքնավար Հանրապետության Գերագույն ռադայի, դիմում է Ռուսաստանի Դաշնությանը՝ Ղրիմի Հանրապետությունը որպես ՌԴ նոր սուբյեկտ Ռուսաստանի կազմ ընդունելու առաջարկով»,- ասված է հաղորդագրությունում։
Տվյալ որոշումն ուժի մեջ է մտնում ընդունման օրվանից։
Ղրիմում մարտի 16-ին անցկացվել էր թերակղզու կարգավիճակի հարցով հանրաքվե, որը նախապես անօրինական էր ճանաչվել Կիևի, ԱՄՆ-ի և Եվրամիության կողմից։ Քաղաքացիների առաջ դրվել էր երկու հարց՝ «Դուք կո՞ղմ եք Ղրիմի՝ որպես ՌԴ սուբյեկտ Ռուսաստանին վերամիավորմանը» և «Դուք կո՞ղմ եք Ղրիմի Ինքնավար Հանրապետության՝ 1992թ․ Սահմանադրության վերականգնմանը և Ղրիմի՝ որպես Ուկրաինայի մաս կարգավիճակին»։
Ինչպես մարտի 17-ին հայտարարել է Ղրիմի Գերագույն ռադայի՝ հանրաքվեի կազմակերպման հարցերով հանձնաժողովի նախագահ Միխայիլ Մալիշևը, Ռուսաստանին միանալուն կողմ է քվեարկել հանրաքվեի մասնակիցների 96,77%-ը՝ 1 մլն 233 հազ․ մարդ։
Հանրաքվեից հետո ԱՄՆ-ի նախագահ Բարաք Օբաման Ռուսաստանի նախագահ Վլադիմիր Պուտինի հետ հեռախոսազրույցում հայտարարել է, որ ո՛չ Միացյալ Նահանգները, ո՛չ միջազգային հանրությունը երբեք չեն ճանաչի Ուկրաինայի Սահմանադրությունը խախտող և Ռուսաստանի ռազմական ինտերվենցիայի ճնշման ներքո ընթացած «հանրաքվեն»։
Հանրաքվեի արդյունքները չճանաչելու մասին հայտարարել են նաև Ֆրանսիան, Մեծ Բրիտանիան, Կանադան, Ճապոնիան։
Եվրոպական խորհրդի նախագահ Հերման վան Ռոմպույի և Եվրահանձնաժողովի նախագահ Ժոզե Մանուել Բարոզուի համատեղ հայտարարությունում ասված է, որ Ղրիմի հանրաքվեն անօրինական է, և դրա արդյունքները երբեք չեն ճանաչվի։