«Դ!եմ եմ» քաղաքացիական նախաձեռնությունը հանդես է եկել հայտարարությամբ Ազգային ժողովի արտահերթ նստաշրջանի օրակարգում ընդգրկված «Կուտակային կենսաթոշակների մասին» Հայաստանի Հանրապետության օրենքում փոփոխություն կատարելու մասին օրինագծի վերաբերյալ: Հունիսի 19-ին Ազգային ժողովը սկսել է վերջինիս քննարկումը:
Հայտարարությունում մասնավորապես ասված է. «ՀՀԿ խորհրդրանական խմբակցությունը, անտեսելով հասարակության պահանջները, երկրի սոցիալ-տնտեսական իրավիճակը և ի վերջո, երկրի շահը, փորձում է ԱԺ արտահերթ նստաշրջանի շրջանակներում ընդունել ՀՀ կառավարության առաջարկած «Կուտակային կենսաթոշակների մասին» Հայաստանի Հանրապետության օրենքում փոփոխություն կատարելու մասին օրինագիծը:
Օրինագիծը կազմվելիս գրեթե հաշվի չի առնվել ՍԴ 2 ապրիլի 2014թ. ՍԴՈ – 1142 որոշման հիմքում ընկած հիմնավորումները, մինչդեռ հենց այդ որոշմամբ էր պայմանավորված նշված օրինագիծը կյանքի կոչելու անհրաժեշտությունը: Ավելին՝ նոր նախագիծը նույնպես պարունակում է տարատեսակ այլ խնդրահարույց դրույթներ:
Հետաքրքիր է, որ հանրության համար նման կարևորագույն նշանակություն ունեցող և նախկինում մեծ աղմուկ առաջացրած օրենքի նոր նախագիծը չի քննարկվել հանրության հետ: Այն հրապարակվել է միայն արտահերթ նստաշրջանի առաջին նիստի օրը` դրանով խախտելով Հայաստանի Հանրապետության մի շարք օրենքներ ու կանոնակարգեր, փաստացի հնարավորություն չտալով ԱԺ պատգամավորներին ծանոթանալ նախագծին: Ընդ որում` նախագծին ծանոթ չեն նաև ՀՀԿ-ական պատգամավորները, որոնք պատրաստվում են քվեարկել այդ օրինագծի օգտին:
Գրեթե բոլոր հիմնավորումները, որոնք մենք բազմիցս բերել ենք արդեն իսկ հակասահմանադրական և անվավեր ճանաչված «Կուտակային կենսաթոշակների մասին» օրենքի հակասահմանադրական, հակասոցիալական, հակամարդկային և հակապետական դրույթների վերաբերյալ, հիմնականում հաշվի չեն առնվել, իսկ վիճահարույց կարգավորումները բովանդակային առումով նույնությամբ կիրառվել են նոր օրինագծում՝ այս անգամ արդեն նոր ձևակերպումներով, ինչը կրկին հաստատում է մեր համոզմունքը առ այն, որ «Կուտակային կենսաթոշակների մասին» օրենքի հիմնական նպատակը ոչ թէ սոցիալական դաշտի բարեփոխումներն են, այլ աշխատավոր քաղաքացիներից լրացուցիչ գումարներ կորզելու օրինական հիմքերի ստեղծումը:
«Դ!եմ եմ» քաղաքացիական նախաձեռնությունը խստագույնս դատապարտում է վարչակազմի՝ Սերժ Սարգսյանի գլխավորությամբ, նման մոտեցումն ու գործելաոճը, որը կարող է բերել հանրային լուրջ ընդվզման: Միաժամանակ կոչ է անում զերծ մնալ հակասոցիալական, հակասահմանադրական և հակամարդկային նոր օրենքի ընդունումից»:
Վարչապետ Հովիկ Աբրահամյանը հունիսի 20-ին, անդրադառնալով նոր օրինագծի վերաբերյալ քննադատություններին, լրագրողներին ասել էր, որ հուլիսի 1-ից պետական համակարգի մոտ 200 հազ. աշխատակիցների աշխատավարձը բարձրանալու է միջինը 40%-ով, և այդ նպատակով պետբյուեջով նախատեսված է մոտ 38 մլրդ դրամ: Նրա խոսքով` պետական համակարգի աշխատակիցների համար նպատակային սոցիալական վճարը կլինի պարտադիր, իսկ մասնավոր հատվածի համար այն պարտադիր կդառնա 2017թ. հուլիսի 1-ից:
Կառավարության կողմից ԱԺ ներկայացրած կուտակային կենսաթոշակային օրենքը իր տրամաբանությամբ չի տարբերվում գործող օրենքից, որի որոշ դրույթներ ճանաչվել են հակասահմանադրական: Ըստ էության, տեղի է ունեցել ձևակերպումների փոփոխություն:
«Դ!եմ եմ» նախաձեռնության անդամները ՍիվիլՆեթին տված հարցազրույցում «խայտառակություն» են որակել «Կուտակային կենսաթոշակների մասին» օրենքի` կառավարության հրապարակած աշխատանքային օրինագիծը: