9 սեպտեմբեր, 2015 16:04

Թեղուտի պաշտպանները ահազանգում են՝ նոր անտառներ են վտանգի տակ

teghut-1Թեղուտի պաշտպանության քաղաքացիական նախաձեռնությունը հայտարարություն է տարածել՝ ահազանգելով, որ Թեղուտի հանքը շահագործող ««Վալեքս գրուպը» ցանկանում է իր ավերիչ գործունեությունը շարունակել նաև անտառային նոր տարածքներում»:

«Գրուպի տասնյակ ընկերություններից մեկը՝ «Թեղուտ» ՓԲԸ-ն, էներգետիկայի և բնական պաշարների նախարարությունից լիցենզիա է ստացել Ծաղկաշատ-Ախետքի պղինձ-մոլիբդենային հանքային դաշտի տեղամասում օգտակար հանածոների երկրաբանական ուսումնասիրություն իրականացնելու համար։ Նախքան այդ գործունեությունը սկսելը, այն պետք է նաև շրջակա միջավայրի վրա ազդեցության գնահատում իրականացնի, որի վերաբերյալ դրական կամ բացասական եզրակացությունը պետք է տրամադրի բնապահպանության նախարարությունը։

Արդեն պարզ է դարձել, որ առանց հանրային իրազեկման և մասնավորապես ազդակիր համայնքների լիարժեք մասնակցության, օրենքի խախտումներով ձեռք են բերվել ինչ-որ «գրություններ» Ծաղկաշատ, Հաղպատ և մյուս համայնքների գյուղապետերից, թե իրենք «համաձայն են երկրաբանական ուսումնասիրություններին»: Համայնքների լիարժեք մասնակցություն իրականում երբեք տեղի չի ունեցել, որոշ լրատվամիջոցների հրապարակումներ ցույց են տալիս, որ ազդակիր համայնքներն իրականում դեմ են նոր հանքարդյունաբերական գործունեությանն ու իրենց շրջակա բնության վրա ունեցած դրա ավերիչ հետևանքներին»,- ասված է հայտարարությունում

Թեղուտի պաշտպանները հիշեցնում են, որ երկրաբանական ուսումնասիրություններից հետո որպես կանոն կառավարությունը տալիս է շահագործման թույլտվություններ, այսինքն՝ եթե գործընթացը սկսվում է, դա ավելի ուշ կանգնեցնելը անհնար է դառնում։ Սեպտեմբերի 10-ին Ալավերդու քաղաքապետարանում տեղի կունենան հանրային լսումներ՝ կապված երկրաբանական նոր ուսումնասիրությունների շրջակա միջավայրի վրա ազդեցության հետ։