Սեպտեմբերի 24-ին բացվել է Դիլիջանի կենտրոնական դպրոցը: Ինչպես հաղորդում են ՀՀ նախագահի գրասենյակից, բացման արարողությանը ներկա է եղել Սերժ Սարգսյանը:

Դիլիջանի կենտրոնական դպրոցը ստեղծվել է 2013թ. «Այբ» կրթական հիմնադրամի կողմից` Կենտրոնական բանկի հետ համագործակցության արդյունքում: Այն հիմնական դպրոց է՝ նախատեսված 1-9-րդ դասարանի մինչև 160 աշակերտի համար:

Դպրոցը հասանելի է ոչ միայն ԿԲ աշխատակիցների, այլև Դիլիջանում բնակվող այլ ընտանիքների երեխաների համար:

«Այբ» կրթական հիմնադրամը պատասխանատու է դպրոցի կառավարման և «Այբ»-ի չափանիշներին համապատասխան ուսումնական բովանդակության վերահսկողության համար: Դպրոցի շենքի կառուցումը և գործունեությունն ամբողջությամբ ֆինանսավորվում է ԿԲ-ի կողմից:

Դիլիջանի կենտրոնական դպրոցի տարածքում տեղակայված է նաև Մասաչուսեթսի տեխնոլոգիական ինստիտուտի հետ համագործակցության արդյունքում ստեղծված ֆաբլաբը՝ գիտարդյունաբերական լաբորատորիան, որը ծառայելու է ինչպես դպրոցի աշակերտներին, այնպես էլ Դիլիջանի և հարակից քաղաքների աշակերտներին, ուսանողներին և ստեղծագործողներին:

Ներկայում դպրոցում սովորող 119 աշակերտների ավելի քան 80%-ը և դպրոցի աշխատակիցների 24%-ը Դիլիջան քաղաքից են, իսկ 22%-ը Երևանից Դիլիջան է տեղափոխվել ընտանիքով, աշխատակիցների 13%-ը Հայաստանի այլ մարզերից է, մնացած աշխատակիցները համատեղում են աշխատանքը Երևանում և Դիլիջանում:

***

Դիլիջանը Հայաստանի ամենաարագ զարգացող քաղաքներից է։ Վերջին տարիներին այստեղ հիմնադրվել են մի շարք կենտրոններ, կրթական հաստատություններ, որոնք քաղաքին նոր շունչ են հաղորդում: Ստորև կարող եք դիտել զարգացող Դիլիջանի մասին ՍիվիլՆեթի տեսանյութը: