Լարսի անցակետի բացումը հետաձգվում է, հաղորդում է Վրաստանի հայալեզու «Ալիք» ռադիոկայանը:
Դարիալիի կիրճի վրաց-ռուսական սահման տանող ճանապարհի վերագործարկումը որոշվել է հետաձգել մինչև հուլիսի 8-9ը` քանի դեռ սողանքի և հեղեղների վտանգը չի նվազել:
Նախօրեին որոշվել էր փորձնական ճանապարհը մասամբ բացել փոքր մեքենաների համար, սակայն հուլիսի 4-ի հորդառատ անձրևի պատճառով որոշումը վերանայվել է: Բացի այդ, օդերևութաբաններն ակնկալում են, որ այս շրջաններում ուժեղ անձրևները չեն դադարի մինչև հուլիսի 7-ը: Տեղումների պատճառով լեռներում հնարավոր են սողանքներ, զգուշացնում է Վրաստանի տարածքային զարգացման և ենթակառուցվածքների նախարարությունը: Ճանապարհը փակ լինի այնքան ժամանակ, քանի դեռ մասնագետները չեն բացառի բոլոր տեսակի վտանգները:
Ճանապարհը վերագործարկելու դեպքում երթևեկությանը հետևելու է պարեկային ոստիկանությունը:
Մասնագետներից վեց օր պահանջվեց` Թերեք գետի այս հատվածը իր նախկին հուն վերադարձնելու համար: Newsgeorgia պարբերականը գրում է, որ արագ փչացող սնունդ տեղափոխող բեռնատարներին Վրաստանի իշխանություններն այլընտրանքային ճանապարհ են առաջարկել` Բաքու մեկնելու միջոցով, իսկ Հայաստանից թարմ միրգ և բանջարեղեն տեղափոխող 55 բեռնատարներ Ռուսաստան են հասել լաստանավերով:
Այլընտրանքային ճանապարհը ոչ միայն շատ հայերի, այլև Հայաստանից մեկնող Ռուսաստանի քաղաքացիների համար հնարավոր չէր օգտագործել: Վրաց-ադրբեջանական սահմանից ՌԴ մի շարք քաղաքացիների հետ են ուղարկել` անձնագրում հայկական կնիք ունենալու պատճառով: Այժմ բեռնատարներ կան թե՛ վրացական, թե՛ ռուսական կողմում: Ռուսական հատվածում սպասող վարորդների համար բոլոր անհրաժեշտ պայմաններն ապահովված են, վրացական կողմում, սակայն վարորդներին որևէ օգնություն չի ցուցաբերվել:
