23 մարտ, 2018 14:22

Քաղաքականացնում են մշակութային շփումները․ հայտարարություն՝ Թուրքիայում «Եվա» ֆիլմի արգելման մասին

Հայաստանի կինեմատոգրաֆիստների միությունը հայտարարություն է տարածել, որում տեղեկացնում է, որ Թուրքիայի իշխանություններն արգելել են հայ-իրանական համատեղ արտադրության «Եվա» ֆիլմի ցուցադրությունը Ստամբուլում անցկացվող կանանց «Ֆիլմմոր» 16-րդ միջազգային կինոփառատոնի շրջանակներում՝ որպես պատճառաբանություն ներկայացնելով Ադրբեջանի իշխանությունների պահանջները՝ կապված «Եվա» ֆիլմի նկարահանումների մի մասն Արցախի Հանրապետությունում իրականացնելու հետ:

«Ցավում ենք, որ թուրքական իշխանությունները, դառնալով Արցախի հարցում Ադրբեջանի շարունակական անհեռանկար քաղաքականության անմիջական կրողը, անթույլատրելիորեն քաղաքականացնում են մշակութային շփումները, կոպտորեն միջամտում են միջազգային կինոփառատոնի գործերին, գրաքննության ու արվեստի ազատության սահմանափակման միջոցներ են կիրառում կինոաշխարհում:

Հիասթափեցնող է այն հանգամանքը, որ թե ադրբեջանական, թե նրա պատանդի կարգավիճակում հայտնված թուրքական իշխանությունները չեն գիտակցում, որ մշակութային փոխգործակցությունը, մշակութային երկխոսությունը հանդիսանում է այսօր աշխարհում իշխող արժեքային համակարգի բաղկացուցիչ մաս և այդ կարգի գործողություններով իրենց դուրս են դնում աշխարհի մշակութային քարտեզից:

Ադրբեջանը շարունակում է հետապնդել մի քաղաքականություն՝ խոչընդոտել ցանկացած երևույթ, որը որևէ կերպ առնչություն ունի Արցախի Հանրապետության հետ, չհասկանալով, որ այդ քաղաքականությունը դատապարտված է և չունի ապագա, իսկ Արցախի Հանրապետությունն ազատ է իր քաղաքականությունը՝ այդ թվում և մշակութային, իրացնելու գործում:

Հայաստանի կինոգործիչների և հասարակության համար անթույլատրելի է և անհասկանալի այս մոտեցումը, քանի որ հայաստանյան ամենատարբեր միջազգային կինոփառատոների շրջանակներում բազմիցս ցուցադրվել են թե թուրքական, թե ադրբեջանական ինչպես համատեղ, այնպես էլ զուտ տեղական արտադրության ֆիլմեր:

Հայաստանի իշխանությունները երբեք արգելք չեն հանդիսացել, չեն գրաքննել մշակութային համագործակցության ոլորտը, չեն կասեցրել մշակութային երկխոսության կայացումը, չեն սահմանափակել կինոաշխարհի իրավունքը՝ դիտել, ճանաչել, հասկանալ այն ամենը, ինչ կատարվում է կինոմշակույթի ասպարեզում:  

Խստորեն դատապարտելով թուրքական իշխանությունների նման գործողությունները, կոչ ենք անում ձեռնպահ մնալ արվեստը՝ տվյալ պարագայում կինոն և միջազգային կինոփառատոնը քաղաքական անհեռանկար նպատակներին ծառայեցնելու գործին, հասարակությունը չպահել այլատյացության մթնոլորտում, որը կարող է լուրջ վտանգ հասցնել մշակութային հետագա համագործակցությանը»,- ասված է հաղորդագրությունում:

*** 
«Եվա» հայ-իրանական համատեղ արտադրության կինոնկարը դրամատիկ պատմություն է մի կնոջ մասին։ Կինոնկարը նկարահանվել է «Հայաստանի ազգային կինոկենտրոնի» և «Ֆարաբի» ֆիլմարտադրության կենտրոն» հիմնադրամի (պետական ֆոնդ) ֆինանսական աջակցությամբ:

Ֆիլմը նկարահանվել է Արցախում։ Դերասաններն են Նարինե Գրիգորյանը, Շանթ Հովհաննիսյանը, Մարջան Ավետիսյանը, Ռոզի Ավետիսովան, Սերգեյ Թովմասյանը, Վրեժ Քասունին, Տիգրան Դավթյանը, Նանոր Պետրոսյանը, Էվելինա Ադամյանը, Մարատ Դավթյանը և այլք։

Կինոնկարի գլխավոր ռեժիսորն ու սցենարի հեղինակը Անահիտ Աբադն է, օպերատորը՝ Հասան Քարիմին, կոմպոզիտորը՝ Վահան Արծրունին, իսկ պրոդյուսերը՝  Թաղի Ալի Ղոլիզադեհը։

Ինչպես հաղորդում է Ahval News կայքը, «Ֆիլմմոր» փառատոնի կազմկոմիտեն ներկայացնող Մելեք Օզմանը հայտնել է, որ Ադրբեջանի հյուպատոսությունը նամակներ է հղել՝ պահանջելով արգելել ֆիլմի ցուցադրությունը։ Ի վերջո, թուրքական իշխանություններից գրավոր հրաման է եկել կինոնկարն արգելելու վերաբերյալ։ Կայքը հավելում է, որ Ադրբեջանի կառավարության պնդմամբ՝ ֆիլմը ստեղծում է «այնպիսի ընկալում, որ Լեռնային Ղարաբաղը Հայաստանի տարածք է»։