13 հունիս, 2018 17:32

Արցախի կայունությունը վեր է ամեն ինչից․ Արմեն Սարգսյան

Բոլորս պետք է ուշադիր լինենք, որպեսզի ծավալվող իրադարձությունները որևէ ձևով չանդրադառնան Արցախի կայունությանը և անվտանգությանը, Ստեփանակերտում հայտարարել է Հայաստանի նախագահ Արմեն Սարգսյանը։ Նա այսօր հանդիպում է ունեցել Արցախի նախագահ Բակո Սահակյանի հետ։

«Արցախպրեսի» հաղորդմամբ՝ Արմեն Սարգսյանն ասել է, որ վաղուց ծրագրում էր մի քանի օրով իր ընտանիքի անդամների հետ այցելել Արցախ և ցույց տալ մեծ մոր՝ Սաթենիկ մայրիկի ծննդավայրը՝ Ասկերանի շրջանի Հարավ գյուղը:

«Ստացվեց այնպես, որ այսօր եկել եմ կարճ այցով, որպեսզի հանդիպեմ Արցախի նախագահին և լինեմ Արցախի կողքին: Ապրիլ-մայիսին, երբ Հայաստանում Թավշյա հեղափոխության գործընթացն էր սկսվել, հաճախ Երևան էր ժամանում Բակո Սահակյանը և իր ներկայությամբ բոլորիս հիշեցնում էր, որ ազգային շահերը վեր են ամեն ինչից: Բոլորս պետք է ուշադիր լինենք, որպեսզի ծավալվող իրադարձությունները որևէ ձևով չանդրադառնան Արցախի կայունությանը և անվտանգությանը: Իմ պարտքն եմ համարում այսօր լինել Արցախում՝ որևէ ձևով ցանկություն չունենալով խառնվել Արցախի ներքաղաքական կյանքին:

Ուրախությամբ պետք է նշեմ, որ Արցախն իսկապես կայացած պետական միավոր է, երկիր, որն ունի ժողովրդական ինստիտուտներ, ընտրած խորհրդարան և նախագահ, ինչպես նաև մարդիկ, ովքեր ոչ միայն հպարտ են արցախցի լինելու համար, այլև որովհետև ունեն կայացած պետություն: Հուսով եմ՝ առկա խնդիրները կլուծվեն հնարավորինս արագ, որովհետև Արցախի կայունությունը վեր է ամեն ինչից»,- նշել է Ա. Սարգսյանը:

ՀՀ Նախագահն ընդգծել է նաև, որ Հայաստանը և Սփյուռքը ուշադիր հետևում են արցախյան իրադարձություններին:

«Արցախը մեր ողջ ժողովրդի համար առանձնահատուկ նշանակություն ունի: Մենք որևէ ձևով իրավունք չունենք պարտություն ունենալ այս հարցում: Վստահ եմ՝ բոլոր խնդիրները կգտնեն լուծումներ»,- եզրափակել է Ա. Սարգսյանը: