31 դեկտեմբեր, 2018 14:41

Ռուսաստանը բարձրացնում է Հայաստանին մատակարարվող գազի գինը

Վարչապետի պաշտոնակատար Նիկոլ Փաշինյանը իր ֆեյսբուքյան էջում ուղիղ եթերում հայտնել է, որ Հայաստան մատակարարվող ռուսական գազի գինը բարձրանալու է, սակայն դա հայաստանյան սպառողների վրա չի ազդելու։

Դեկտեմբերի 27-ին Փաշինյանը Մոսկվայում հանդիպում էր ունեցել Ռուսաստանի նախագահ Վլադիմիր Պուտինի հետ, սակայն գազի գնի շուրջ պայմանավորվածություն ձեռք չէր բերվել։ Հանդիպման հաջորդ օրը՝ դեկտեմբերի 28-ին, ռուսական կողմը հայտարարեց, որ գազի գնի շուրջ բանակցությունները պետք է արագացվեն։ Դեկտեմբերի 28-ին ռուսական «Գազպրոմը» հայտարարություն տարածեց, որ ընկերության ղեկավար Ալեքսեյ Միլլերը Հայաստանի փոխվարչապետի պաշտոնակատար Մհեր Գրիգորյանի հետ Սանկտ Պետերբուրգում քննարկել էգազի հաջորդ տարվա մատակարարումների հարցը:  

Այսօր ուղիղ եթերում Փաշինյանը, որը մեկնում էր զինվորների Ամանորը շնորհավորելու, ասել է, որ նախօրեին երկու անգամ հեռախոսազրույց է ունեցել Պուտինի հետ։

«Ես երկու անգամ հեռախոսազրույց եմ ունեցել Ռուսաստանի նախագահ Վլադիմիր Պուտինի հետ, և խոսակցությունների թեման եղել է Հայաստաին մատակարարվող գազի գինը, և կարելի է ասել՝ եկել ենք լուծման առաջիկա տեսանելի ապագայի համար»,- ասել է Փաշինյանը:

Փաշինյանը նշել է, որ հայաստանցի սպառողներին գազի մատակարարման երկու օղակ կա, մեկը ռուսական կողմից «Գազպրոմ Արմենիա» ընկերությանը մատակարարվող գինն է, մյուսը՝ «Գազպրոմ Արմենիա»-ի կողմից սպառողներին մատակարարվող գինը։

«Ստացվել է այնպես, որ «Գազպրոմ Արմենիա» և «Գազպրոմ» ընկերությունները պետք է վերանայեն գազի մատակարարման գինը, և գնի որոշակի բարձրացում է տեղի ունենալու, բայց ներքին կարգավորումների շնորհիվ հայաստանյան սպառողների համար գազի գնի փոփոխություն տեղի չի ունենալու»,- ասել է Նիկոլ Փաշինյանը՝ ակնարկելով, որ սպառողների համար գազի սակագնի պահպանումը կլինի «Գազպրոմ Արմենիա»-ի շահույթի մարժային նվազման հաշվին։

Ներկայում «Գազպրոմը» իր հայկական դստերը՝ «Գազպրոմ Արմենիա»-ին 1000 խմ գազը մատակարարում է 150 դոլար գնով։ «Գազպրոմ Արմենիան» հայաստանցի սպառողներին գազը մատակարարում է 1 խմ-ն 139 դրամով, իսկ սոցիալապես անապահովներին 80 դրամով՝ մինչև 600 խմ ծավալը։

Փաստացի ռուսական «Գազպրոմ Արմենիան» բնակիչ-սպառողներին գազը վաճառում է մոտ 285 դոլարով 1000 խմ-ն՝ այդ ծավալը ձեռք բերելով 150 դոլարով։

Լրացում

«Գազպրոմը» հաղորդել է, որ գազի սակագինը Հայաստանի համար թանկանում է 10 տոկոսով՝ գործող 150 դոլարի փոխարեն կլինի 165 դոլար 1000 խմ-ի դիմաց։