10 մայիս, 2019 17:55

Կյանքից հեռացել է հայագետ Նիզար Խալիլին

Մայիսի 8-ին Սիրիայի հայաբնակ Քեսապ գյուղում 93 տարեկան հասակում կյանքից հեռացել է արաբ գրող, հայագետ և թարգմանիչ Նիզար Խալիլին։

Նիզար Խալիլին ծնվել է 1925-ին Հալեպում (Սիրիա)։ Բարձրագույն կրթությունը ստացել է Բեյրութում։

1943-1946 թվականներին աշխատել է Հալեպի Նոր Գյուղ Հայկական թաղամասի Զավարյան վարժարանում՝ որպես արաբերենի ուսուցիչ։

Հայերենի մեջ հմտացել է մանկավարժական աշխատանքի ընթացքում։ Ուսումնասիրել է հայ ժողովրդի պատմությունը, մշակույթը, մասնավորապես՝ գեղարվեստական գրականությունը։ Քանիցս այցելել է Հայաստան։

Խալիլին հայ մշակույթին, հայ-արաբական գրական առնչություններին նվիրված բազմաթիվ հոդվածների հեղինակ է։

Նրա թարգմանությամբ արաբերեն առանձին գրքույկներով հրատարակվել են Հովհաննես Թումանյանի, Գրիգոր Զոհրապի, Ավետիք Իսահակյանի, Հովհաննես Շիրազի ստեղծագործությունները։ Խալիլին հայերեն է թարգմանել արաբ հեղինակների գործերից։ Գրել է նաև հայերեն բանաստեղծություններ։

Առաջինն անգամ արաբերեն է թարգմանել Գրիգոր Նարեկացու «Մատյան ողբերգության» աշխատությունը։

Ռիթա Մանճիկեան

ՍիվիլՆեթի հարցազրույցը Նիզար Խալիլիի հետ , ապրիլ 24, 2012