8 օգոստոս, 2019 18:23

Գրպանահատության դեպքերի 90%-ով քրեական գործ չի հարուցվում․ ոստիկանություն

Սոցիալական ցանցերում ակտիվորեն շրջանառվում են տրանսպորտային գրպանահատության՝ վերջերս հաճախակի դարձած դեպքերը։ Օգտատերերը տարածում են գրպանահատների նկարները, թեգում իրավապահ մարմինների էջերը։ Այս ամենին արձագանքելով՝ ոստիկանությունն այսօր՝ օգոստոսի 8-ին, ասուլիս էր հրավիրել՝ ներկայացնելու գրպանահատության դեմ պայքարի շրջանակում ոստիկանության կատարած աշխատանքների արդյունքները։ 

Ոստիկանության գնդապետ Հակոբ Պետրոսյանի խոսքով՝ 2019-ի առաջին կիսամյակում գրանցված գրպանահատությունները նախորդ տարվա առաջին կիսամյակի համեմատությամբ աճել են 70%-ով։ Նման ցուցանիշը մի քանի պատճառ ունի։ Գրպանահատության դեպքերի միայն 10%-ն է քրեորեն հետապնդվում, քանի որ քաղաքացիների մեծ մասը ոստիկանություն չի դիմում կամ հետագայում հրաժարվում է իր բողոքից։

«Ըստ քրեադատավարական կարգավորումների՝ գրպանահատությունը մասնավոր մեղադրանքի գործ է, ինչը բարդացնում է ոստիկանության աշխատանքները: Նման գործերը հարուցվում են միայն տուժողի բողոքի հիման վրա, այսինքն, եթե մենք քրեական գործով չունենք տուժողի բողոք, քրեական հետապնդում չի կարող իրականացվել»,- մանրամասնեց Հակոբ Պետրոսյանը։

Գրպանահատության ռեցիդիվը, ի տարբերություն այլ հանցատեսակների, շատ բարձր է։ Գրպանահատներն իրենց գործողությունները դիտարկում են որպես արհեստ, ուսմունք՝ շարունակաբար զարգացնելով իրենց «հմտությունները»։

«Գրպանահատությունը դասվում է դժվար բացահայտվող հանցատեսակների շարքին, սակայն Հայաստանում դրա բացահայտման տոկոսը բարձր է՝ մոտ 45%»,- ընդգծեց Հակոբ Պետրոսյանը:

 Վիճակագրակությունը վկայում է, որ գրպանահատության շուրջ 95%-ը կատարվում է Երևանում՝ հիմնականում հասարակակնան տրանսպորտում։

Ժաննա Պողոսյան