28 նոյեմբեր, 2019 12:51

Ադրբեջանի իշխող ուժը որոշել է արձակել խորհրդարանը․ որն է իրավական մեխանիզմը

Ադրբեջանի իշխող՝ «Նոր Ադրբեջան» կուսակցության քաղաքական խորհրդի արտահերթ նիստին որոշում է ընդունվել խորհրդարանի՝ Միլլի մեջլիսի արձակման վերաբերյալ։

Մեջլիսի վաղվա նիստին խորհրդարանական մեծամասնությունը, որը ներկայացնում է իշխող կուսակցությունը, կբարձրացնի այդ հարցը։ Որոշման մեջ նշվում է, որ առաջարկը պայմանավորված է «երկրում սկսված բարեփոխումների և կադրային փոփոխությունների գործընթացին աջակցելու անհրաժեշտությամբ»։

Վերջին ընտրությունները Ադրբեջանում կայացել են 2015-ի նոյեմբերի 1-ին։

Միլլի Մեջլիսը կազմված է 125 պատգամավորից, որոնք ընտրվում են մեծամասնական ընտրակարգով։

Ադրբեջանական ընդդիմադիր՝ Turan գործակալությունը անդրադարձել է Միլլի Մեջլիսը արձակելու առաջարկի իրավականությանը։

Այսպես, խորհրդարանն արձակելու նորմը ամրագրվել է Ադրբեջանի սահմանադրությունում 2016-ին տեղի ունեցած հանրաքվեի արդյունքում։

Հանուն Հեյդար Ալիևի. Ադրբեջանը փոխում է Սահմանադրությունը

Նորմը, ի թիվս այլ կետերի, սահմանում է՝ եթե Միլլի Մեջլիսի նույն գումարումը անհաղթահարելի պատճառներով չի կատարում իր լիազորությունները՝ նշված կոնկրետ հոդվածներում, պետության ղեկավարը արձակում է այն։

Իրավագետ Ալեսքեր Մամեդլին կարծիք է հայտնել, որ ներկա իրավիճակում, ըստ ամենայնի, արհեստականորեն կստեղծվի իրավիճակ, երբ խորհդարանը չի կարողանա արդյունավետ աշխատել։

Մեջլիսի նիստերի իրավազորության համար անհրաժեշտ է առնվազն 83 պատգամավորի մասնակցությունը։ Հաշվի առնելով, որ ադրբեջանական խորհրդարանում մոտ 70 մանդատ պատկանում է «Նոր Ադրբեջան»-ին և դրա անդամները զանգվածայնորեն հրաժարական կտան, խորհրդարանը փաստացիորեն չի կարողանա կատարել իր լիազորությունները։

Դրանից հետո նախագահը կընդունի խորհրդարանն արձակելու և արտահերթ ընտրություններ անցկացնելու որոշում։

Արտահերթ ընտրությունների ժամկետը պետք է նշանակվի քվեարկությունից առաջ առնվազն 60 օր շուտ։

Նկատի առնելով, որ ընտրությունների նախապատրաստման համար ժամանակ է անհրաժեշտ, դրանք կարող են անցկացվել 2020-ի փետրվար-մարտ ամիսներին։

Ստելլա Մեհրաբեկյան