1 հունիս, 2020 15:01

Քաջ Նազարը եւ Քորոնան․ դիպուկ այլաբանութիւններ՝ Խաժակ Այնթապեանի գրիչէն

Այնճար հայկական աւանի բնակիչ, մասնագիտութեամբ ատամնաբոյժ Խաժակ Այնթապեան, վերջին շրջանին գրեթէ ամէն Կիրակի, դիմատետրի էջին վրայ կը հրապարակէ իր իւրայատուկ, համով, գիւղական ոճով գրուած այլաբանական պատումներ, որոնք, իրենց շօշափած նիւթերով եւ դիպուկ ակնարկներով հանրային լայն ընդունելութիւն գտած են։ Անցեալ Կիրակի օրուան գրութիւնը կը վերաբերի Քորոնա Ժահրին։  

ԽԱԺԱԿ ԱՅՆԹԱՊԵԱՆ

 «Այս կիրակի մէկ ճար մնաց այլեւս ՝ պիտի երթամ Քաջ Նազարը գտնեմ: Թող մեր անյաղթ հերոսը գայ ու մէկ զարկով սա քորոնային վերջը տայ:
Ո՞ւր կրնամ գտնել Քաջ Նազարը այս օրերուն... Նախ եւ առաջ չորս կողմս փնտռեմ, թերեւս հոս է, մեր արաբ հարեւաններէն մէկուն քով կերուխումով զբաղած է:
- Բարեւ ձեզ , քաջ Նազարը գիտէ՞ք ուր է:
- Քաջ Նազարը ո՞վ է... Ինչ կ'ըլլաս ազգային բժիշկ, բան մը ըրէ , սա քորոնայէն մեզ ազատէ :
Չէ , ասոնց մէջէն դժուար թէ քաջ Նազար ելլէ ... Ամէն մարդ առանց դիմակ նստած քէֆ կ'ընէ, յոյսը նորէն օտարներուն վրայ դրած է ... Բայց կարծես թէ այս անգամ ոչ իրենց նաւթը, ոչ ալ օտարին գաւազանը պիտի ասոնց օգնէ...
Աւելի լաւ է ելլեմ երթամ եւրոպա կամ ալ հասնիմ Ամերիկա...
- Բարեւ, ինչպէ՞ս էք, քաջ Նազարին տեղը գիտէ՞ք...
- Ի՞նչ Քաջ նազար ազգային բժիշկ, դուն մեզի ըսէ սա քորոնային ճարը ինչ է ...

Ասոնք ալ միշտ արաբներուն վրայ կը խնդան , հիմա իրենք շատ աւելի գէշ վիճակի մէջ ինկան ... Իբր թէ քորոնայէն վախցան , բոլորն ալ առանց դիմակի , ազատ համարձակ «Մոլ»երուն մէջ թափառեցան.... Վերջն ալ իրենց ունեցած չունեցածով , մեծ ու պզտիկ գիտուններով եւ իրենց հզօր «թեքնոլոճի»ով քորոնային առջեւ խայտառակ եղան ...
Ո՞ւր պիտի գտնեմ Նազարը... Երթամ հասնիմ Հնդկաստան, Չինաստան կամ Փաքիստան... Բոլորն ալ ազատ համարձակ մէջտեղերը ման կու գան... Քաջ նազարը ո՞ւր է կ'ըսես, կը զարմանան բայց չես գիտեր ուրկէ ուր բոլորն ալ զիս կը ճանչնան, «ազգային բժիշկ», կ'ըսեն «հեռացուր մեզմէ սա քորոնան» եւ յոյսերնին վրաս դրած մուկ ու չղջիկ կուլ կու տան...

Ես ալ զարմանալի մարդ մըն եմ, մեր Նազարը օտարներուն մէջ կը փնտռեմ... Մինչդեռ եթէ մեր հայերուն հարցնեմ, ինչպէս ալ ըլլայ անոնց մէջէն ես նազար մը կը գտնեմ ...
- Բարեւ հայ ժողովուրդ քաջ Նազարը գիտէ՞ք ուր է ...
- Քաջ Նազարը ինչի՞դ պէտք է ...
- Թող գայ ու մէկ զարկով սա քորոնան թող ջարդէ ...
- Մի վախնար ախպեր ջան , քորոնան ում շունն է ...
- Քորոնան շատ վտանգաւոր է , բայց զարմանալի է որ ոչ մէկուդ հոգն է ... Ինչպէս չէ՞ք վախնար... Ինչպէս առանց դիմակ , այսպէս ազատ ու համարձակ մէջտեղերը ման կու գաք..
- Դուխով ախպեր ջան, դուխով ման կու գանք...

Զարմանալը աւելորդ է ... Մեր ազգին մէջ ամէն մարդ ինքզինք քաջ նազարը կը կարծէ ...
Աւելի լաւ է ուրեմն տուն վերադառնամ ու ես Քաջ նազար դառնամ: Հաւաքեմ մեր Այնճարցիները, ամէն մէկուն դիմակ մը տամ եւ անոնց հետ լեռ բարձրանամ ... Մենք տոկուն ենք, Մուսա լեռան վրայ քառասուն օր դիմացանք հոս ալ ինչպէս ըլլայ, ձեռք ձեռքի տուած քառասուն ամիս կը դիմանանք, յետոյ ողջ ու առողջ տուն կը դառնանք...
Իսկ դուք յանկարծ ձեր յոյսը մեր վրայ չդնէք, աւելի լաւ կ'ըլլայ դիմակ կրեցէք կամ ալ մեզի պէս լեռ բարձրացէք:»