Հայ-ադրբեջանական սահմանային բախումը սպառնում է երկու երկրների շահերին, ինչպես նաև տարածաշրջանային կայունությանն ու անդորրին՝ մտահոգություն հարուցելով․ այս մասին հայտարարել է Իրանի նախագահի աշխատակազմի ղեկավար Մահմուդ Վաեզին։  

Թվիթերում արված գրառման մեջ իրանցի պաշտոնյան մասնավորապես գրել է․ «Հակամարտությունների քաղաքական կարգավորումը, որը հաշվի է առնում երկու երկրների շահերը և պետությունների տարածքային ամբողջականությունը, միակ ելքն է ճգնաժամից»։

Armenia-Azerbaijan border clash threaten both countries’ interests as well as regional stability and calm and is cause for worry. Political settlement of disputes considering the interests of both countries and the states’ territorial integrity is the only way out of the crisis.

— Mahmoud Vaezi (@Dr_Vaezi) July 14, 2020

Ինչպես հաղորդում է իրանական IRNA գործակալությունը, Հայաստանի և Իրանի արտաքին գործերի նախարարներ Զոհրաբ Մնացականյանի և Մոհամադ Ջավադ Զարիֆի հեռախոսազրույցում վերջինս հայտնել է իր երկրի պատրաստակամությունը՝ թուլացնելու երկու երկրների միջև լարվածությունը։

ՀՀ ԱԳՆ հաղորդագրության համաձայն՝ Մնացականյանը իր իրանցի գործընկերոջը ներկայացրել է Ադրբեջանի կողմից ուժի կիրառման արդյունքում հայ-ադրբեջանական սահմանի հյուսիսարևելյան հատվածում ստեղծված իրավիճակը։

«Երկուստեք ընդգծվեց տարածաշրջանային անվտանգության և կայունության պահպանման, հակամարտությունները բացառապես խաղաղ ճանապարհով կարգավորելու անհրաժեշտությունը»,- ասված է ՀՀ ԱԳՆ տարածած հաղորդագրությունում։